دوێنێ رێگریان لە پەیامنێر 964 کرد؛ ئەمڕۆ داواى لێبوردنیان کرد

ژوورى هەواڵ

ئەو کۆمپانیا سیکوریتییەی دوێنێ رێگرییان لە پەیامنێری 964 کرد، ئەمڕۆ بە نوسراوی فەرمی داوای لێبوردنیان لە 964 و دیلان محەمەدجەزا کرد، داوای لێبوردنەکەیان قبووڵکراو ئیدارەی 964 سوپاسی کۆمپانیاکەی کرد کە هەستیان بە بەرپرسیارێتی کردو هەڵەکەیان راستکردەوە.

چی روویدا؟

–  دوێنێ دیلان محەمەدجەزا پەیامنێری 964 لە سلێمانی کاتێک چوو بۆ رووماڵی کێشەیەک لە نزیک یەکێک لە نەخۆشخانە تایبەتەکان لە سلێمانی، چەند کارمەندێکی کۆمپانیایەکی سکیوریتی رێگریان لێکردو هێرشیان کردە سەر.

–  تۆڕی 964 ئەم پێشێلکارییەی بڵاوکردەوەو رێوشوێنی یاسایی خۆی گرتە بەرو لە بنکەی پۆلیسی ئەزمەڕ داوای یاسایی تۆمارکرد.

–  964 لەسەر ئەو بنەمایە کاری کرد کە نە ناوی کۆمپانیاکەو نە ناوی نەخۆشخانەکەی نەهێناو هیچ کاردانەوەیەکی لابەلای نەبوو.

–  هەر ئەو کات ئیدارەی سلێمانی و دەزگا پەیوەندیدارەکان لەم رێگرییە ئاگادارکرانەوەو داوایان لێکرا لە ئاست ئەم پێشێلکارییە بێدەنگ نەبن.

–  دۆستانی 964 و دۆستانی میدیای ئازاد هەڵوێستی مەردانەی خۆیان لەسەر ئەم رووداوە دەربڕی.

–  بەرپرسانی کۆمپانیا سکیوریتییەکە هەر شەوێ پەیوەندییان کرد بە ئیدارەی 964 و رایانگەیاند ئەوان لێکۆڵینەوە لە رووداوەکە دەکەن و کارمەندە کەمتەرخەمەکانیان سزا دەدەن.

–  ئەمڕۆ دیسانەوە بەرپرسانی ئەو کۆمپانیایە پەیوەندیانکردەوەو رایانگەیاند دوای لێکۆڵینەوە بۆیان دەرکەوتووە دوو کارمەندی ئەوان کە لە ئەرکدا نەبوون سەربەخۆ ئەو کارەیان کردووەو ئامادەیی خۆیان نیشاندا بۆ هەر لێپێچینەوەیەکی یاسایی.

–  هەر ئەمڕۆ بەنووسراوی فەرمی داوای لێبوردنیان لە 964 کردو لە نوسراوەکەدا هاتووە: ”بەناوی کۆمپانیاکەمان و سەرجەم کارمەندەکانمانەوە داوای لێبوردن لە بەڕێزتان دەکەین سەبارەت بەو رووداوە، ئاواتەخوازین جارێکی تر کە هیچ جێگەی بینەری رووداوی هاوشێوە نەبینەوە.. سوپاس بۆ پاراستنی ناوی کۆمپانیاکەمان و مامەڵەکردنی بەڕێزتان بەو شێوە جوان و سەنگینە کە نەبوونە هۆی ناوزڕاندنی هیچ کەس و لایەنێک”.

–  میوانداری بەڕێز دیلان محەمەدجەزایان کردو کارمەندەکان و کۆمپانیاکە داوای لێبوردنیان لێکردو چەپکە گوڵیان پێشکەش کرد.

سوپاسێک لە 964ەوە

تۆڕی 964 هەموو کات بڕوای بەوە هەبووە لە کاتی راپەڕاندنی ئەرکی میدیاییدا رێی تێ دەچێت هەڵە لێکتێگەیشتن و ئاستەنگ رووبدات، هیچ کاتێک تیمەکەمان بە دوای خۆ بەپاڵەوان کردندا نەگەڕاوەو پێمان وایە ئەوەی دەیکەین ئەرکی خۆمانەو رایدەپەڕێنین و منەتمان بەسەر کەسدا نییە، بەڵام بێگومان بەو پەڕی مکوڕییەوە بەرگری یاسایی لە تیمە دڵسۆزەکەمان دەکەین.

لەم رووداوەی دوێنێ روویدا زۆرێک لە دۆستان و ئازیزان لوتفیان نواندو بە دەم کێشەکەوە هاتن، بۆیە 964 پێی وایە سوپاسی ئەم بەڕێزانە قەرزدارە:

–  رائید ئاری لەتیف، وتەبێژی پۆلیسی سلێمانی

–  بنکەی پۆلیسی ئەزمەڕ

–  رەحمان غەریب، رێکخەری سەنتەری میترۆ

–  کاروان ئەنوەر، بەرپرسی لقی سلێمانی سەندیکای رۆژنامەنووسان

–  رۆژنامەنووسان و هاوکارانمان لە دەزگاکانی دیکەو دۆستانی 964

–  ئەو کۆمپانیا سکیوریتییەی بە بەرپرسیارێتی و پڕۆفیشناڵییەوە مامەڵەی لەگەڵ دۆسێکە کردو چاوپۆشی لە کارمەندە کەمتەرخەمەکانی خۆی نەکردو بە بوێرییەوە داوای لێبوردنی کرد.