شەقامی قیڕتاو و کۆنکرێت جیاوازیان چییە؟

964+
فەهمی نەبی
شارەوانی هەولێر رایدەگەیەنێت ئەگەرچی خەڵک زۆرتر خواستی لەسەر قیرتاوکردنە، بەڵام لەماوەی ساڵی رابردوو 80 هەزار مەتر چوارگۆشەی شەقامەکانی هەولێر کۆنکرێت کراون.

بەگوێرەی پلانی وەزارەتی شارەوانی هەر شەقامێک لە 10 مەتر کەمتر بێت، بۆ ئەوەی هاتووچۆی ئۆتۆمبێڵ تیایدا ئاسان بێت، کۆنکرێت دەکرێت.

رازان خەلیل ئیسماعیل، بەڕێوەبەری هونەری لە شارەوانی هەولێر، بۆ تۆڕی 964 قسەیکرد دەڵێت ئەو کۆڵانانەی هاتووچۆی سەیارەی زۆری بەسەرەوە بێت و لە 10 مەتر کەمتر بێت ئێمە بڕیاردەدەین کۆنکرێت بکرێت، خەڵک زۆرتر خواستی لەسەر قیرتاوکردنە وەک لە کۆنکرێتکردن.

لە زانستی ئەندازیاری رێگاوبان ئەوە هاتووە، کۆنکرێت بەهێزترە، بەڵام تەمەنی قیڕ زیاترە.

بە وتەی رازان، لە عێراقدا بەگشتی قیر هەرزانتر دەکەوێت وەک لە کۆنکرێت، تێچووی یەک مەتر چوارگۆشە لە قیر 20 دۆلارە، بەڵام یەک مەتر چوارگۆشە کۆنکرێت تا 50 دۆلار دەڕوات.

سەرمەد محەمەد، بەڕێوەبەری کارگەی قیری شارەوانی هەولێر پێشتر بە تۆڕی 964ی وتبوو کوالێتی قیری کارگەی هەولێر لە جۆری “Job Mix”ە و بەشیوازێکی ئەندازیاری کوالێتی بەرز بەرهەم دەهێنرێت.

بەپێی ئاماری شارەوانی هەولێر، ساڵی رابردوو لەشاری هەولێر 80 هەزار مەتر چوارگۆشەی شەقام کۆنکریت کراوە، نزیکەی ملیۆنێک و 400 هەزار مەتر چوارگۆشەی شەقام قیڕتاوکراوە، هەر لەوساڵەدا نزیکەی 93 پرۆژەی قیڕتاوکردن جێبەجێکراوە.