دوو ساڵ بەسەر هێرشی 7ـی ئۆکتۆبەری حەماس بۆ سەر ئیسرائیل تێپەڕی

964+

توانا نەقی

ئەمڕۆ 7ـی ئۆکتۆبەری 2025 دوو ساڵ بەسەر ئەو هێرشەدا تێدەپەڕێت کە حەماس کرییەسەر ئیسرائیل و لەوێوە تاوەکو ئێستا ئاگری شەڕ و پێکدادانەکان گەرمبوو بە هەزاران کەسیش بوون بە قوربانی.

ئەمڕۆ سێشەممە، حەوتی ئۆکتۆبەرە و دوو ساڵ بە سەر ئەو رۆژەدا تێپەڕدەبێت کە ئیسرائیلیەکان بە دەنگی موشەک و گولـلەباران خەبەریان بووەوە.

لەو رۆژەدا بە سەدان چەکداری رێکخراوی حەماس لەژێر ناوی ئۆپەراسیۆنی “تۆفانی ئەقسا”، هێرشیان کردە سەر چەند کۆمەڵگەیەکی جوونشین لە نزیک کەرتی غەززە و لە ئەنجامدا دەیان ئۆتۆمبێل و باڵەخانە سووتێنران و سەدان کەس کوژران و بریندار بوون، بە دەیان کەسیش بەدیل گیران، ئاگری شەڕەکەش تا ئێستا بڵێسە دەکات و نەکوژاوەتەوە.

لەدوای ئەو هێرشانەوە ئیسرائیل چەندین سەرکردەی حەماسی کردووەتەوە ئامانج و کوژراون، ئەمە جگە لەوەی غەزەی وێرانکرد و بە هەزاران کەس بێحاڵ و ماڵ بوون و بە دەیان هەزار منداڵیش بوونەتە قوربانی.

دوای دوو ساڵ ئێستا بە پلانێکی دۆناڵ ترەمپ و بە هاوکاری وڵاتانی عەرەبی ئاگربەستی غەزە راگەیەندراوە و حەماسیش رازیبوونی خۆی پێشانداوە و ماوەتەوە تەنیا رێککەوتنەکە جێبەجێ بکرێت بە پێی بەو بەندانەی کە ئەمریکا و وڵاتانی عەرەبی لەسەری رێک کەوتوون.