ماسیەکانى سەرچاوەى ئاوى تابین رزگار دەکرێن

وریا فەتاح

قائیمقامى دوکان رایگەیاند، هەر ئەمڕۆ ژیانى ئەو پەنجە ماسیانە رزگار دەکرێت کە لەسەرچاوەى ئاوى تابین بەهۆى کەمبوونەوەى ئاوەوە ژیانیان کەوتووەتە مەترسییەوە.

ئێوارەى دوێنێ، راماڵ چاوەڕێ کە هاوڵاتى و چالاکوانێکى سنوورى دوکانە، لە فەیسبوکەکەى خۆیەوە پۆستێکى کرد و ڤیدیۆیەکى سەرچاوەى ئاوى تابینى بڵاوکردەوە کە تێیدا دەردەکەوێت، بەهۆى کەمبوونەوەى ئاوى سەرچاوەى تابین، مەترسى کەوتووەتە سەر ژمارەیەکى زۆرى ماسى و پەنجە ماسى، هەر ئەمڕۆ قائیمقامى دوکان و بەرێوەبەرى کشتوکاڵ و هۆبەى پەنجەماسى، سەردانى شوێنەکەیان کرد.

سیروان سەرحەد، قائیمقامى دوکان بە 964ـى وت،”سەرچاوەى ئاوى تابین، سەرچاوەیەکى گرنگى ئاوە بەتایبەت بۆ کشتوکاڵ کە لە دوو بەش پێکدێت، بەشێکى شیرینە و ئەوەى تر کبریتاوییە و کە بەهۆى کەمبوونەوەى ئاوەوە بۆنى کردووە و ئۆکسجینەکەى کەمبووەتەوە و ماسییەکانى ئەو بەشە مەترسیان لەسەرە”.

وەک باسى دەکات، کارمەندانى هۆبەى پەنجەماسى بریاریانداوە، ماسییەکانى بەشى ئاوە بۆنکردووەکە بگوازنەوە بۆ سەرچاوەى ئاوە شیرینەکە، چونکە نزیکن لەیەکەوە ئاسانتر ئەنجام دەدرێت و ژیانیان رزگار دەکرێت.

سوپاسى ئەو هاوڵاتى و چالاکوانەشى کرد کە ئاگادارى کردووەنەوتەوە لەو حاڵەتە.