هەر کۆچبەریک بچێتە یۆنان دوو بۆ پێنج ساڵ بەند دەکرێ

ئەحمەد مستەفا

لە ئەمڕۆوە هەر کەسێک بە نایاسایی بچێتەوە یۆنانەوە، روبەڕوی ئەم رێکارە دەبێتەوە، دوو بۆ پێنج ساڵ بەندکردن و پێنج هەزار یۆرۆش غرامە دەکرێ، ئەمە قسەی پێشڕەو عەبدوڵا، نوێنەری کۆمەڵەی پەنابەرە گەڕاوەکان لە ئەوروپایە بۆ 964.

ئەو نوێنەرە ئەوەشی بە 964 وت، ئەمە رێکارێکی نوێیە و ئەگەر هاتوو داوای مافی پاراستنی نێودەوڵەتی کەسەکەش رەتبکرێتەوە، یەک رێگا لە پێش کۆچبەرەکە دەمێنێتەوە، ئەویش گەڕانەوە بۆ وڵاتەکەی خۆی.

کەشوهەوا تاڕادەیەک جێگیرە، بەڵام شەپۆلی دەریا ئامان و زەمانی نییە تا کۆتایی مانگی ئاب، کۆچبەرەکان هەوڵی تەواو دەدەن بۆ گەشتن بە سنووری جوگرافی یەکێتی ئەوروپا.

بەپێی ئامارەکانی بەردەستی دەزگای لوتکە بۆ کاروباری ئاوارە و پەنابەران، لە سەرەتای ئەمساڵەوە حەوت هەزار و 300 کۆچبەر گەیشتوونەتە کریت و گاڤدۆس لە یۆنان، لەکاتێکدا لە سەرجەم ساڵی 2024دا، چوار هەزار و 935 کۆچبەر گەیشتوونەتە سەر کریت و گاڤدۆس، تەنیا لە سەرەتای مانگی حوزەیرانەوە تا ئێستا دوو هەزار و 550 حاڵەتی هاتنی گەشتیاران تۆمارکراوە.

بەپێی بەدواداچوونەکانی دەزگای لوتکە لە شەش مانگی یەکەمی ساڵی 2025، رێژەی کۆچکردن بۆ کەناراوەکانی باشووری کریت بە ڕێژەی 350% زیادیکردووە.

دەریای ناوەڕاست بە یەکێک لە مەترسیدارترین رێگاکانی کۆچکردن دادەنرێت لە جیهاندا، لە ساڵی 2024، 672 کۆچبەر گیانیان لەدەستداوە و هەزار و 15 کۆچبەری دیکەش بێسەروشوێن بوون، لە ساڵی 2023، 962 کۆچبەر گیانیان لەدەستداوە و هەزار و 539 کۆچبەریش بێسەروشوێن بوون.