فڕۆکەیەکی هێڵی لوفتهانزا. وێنە: X
فڕۆكەوانی عێراق:
حەوت كۆمپانیای فڕۆكەوانی گەشتەكانیان بۆ عێراق دەستپێكردووەتەوە
964+
ئەرسەلان عەبدوڵا
كۆمپانیای گشتی بۆ خزمەتگوزاری گەشتی ئاسمانی سەر بە وەزارەتی گواستنەوەی عێراق، رایگەیاند حەوت هێڵی ئاسمانیی نێودەوڵەتی گەشتەكانیان بۆ عێراق دەستپێكردووەتەوە و گەڕاونەتەوە ئاسمانی عێراق.
کۆمپانیاکە لە راگەیاندراوێكدا ئەمڕۆ دووشەممە 21.7.2025 ئاشكرای كرد، “گەڕانەوەی هێڵە ئاسمانییە نێودەوڵەتییەكان بۆ ئاسمانی عێراق پێشهاتێکە کە رەنگدانەوەی گەشەسەندنی متمانەی نێودەوڵەتییە بەو خزمەتگوزارییانەی کە کۆمپانیاکەیان پێشکەشی دەکات و پابەندبوونی تەواوەتییە بە ستانداردەکانی رێکخراوی فڕۆکەوانی مەدەنی نێودەوڵەتی (ICAO)”.
بەگوێرەی راگەیاندراوەكە، بەڕێوەبەری گشتیی کۆمپانیای گشتی بۆ خزمەتگوزارییەکانی گەشتە ئاسمانییەكان، عەباس سەببار ئەلبەیزانی دەڵێت: “گەڕانەوەی ئەم کۆمپانیایانە ئاماژەیەکی روونە بۆ پەرەسەندنی خێرای پەیوەندییەکانی نێوان عێراق و کۆمپانیا نێودەوڵەتییەکانی گواستنەوەی ئاسمانی”.
ئاشكراشی كرد ئەو كۆمپانیایانەی گەڕاونەتەوە ئاسمانی عێراق و گەشتەكانیان ئەنجام دەدەن، پێكدێن لە “کارگۆی ئەڵمانی، سویس ئایەر”لوفتهانزا ئایرێکس، هێڵی ئاسمانیی كانتاس، گاینت کارگۆ، هێڵی ئاسمانی پۆڵەندی، ویز ئایەر ئەبوزەبی”.
بەهۆی شەڕی ئیسرائیل و ئێران لە ناوەڕاستی مانگی رابردوو، كە 12 رۆژی خایاند، هەموو گەشتییە ئاسمانییەكان و ترانزێتی ئاسمانی عێراق و هەرێمی كوردستان و زۆربەی وڵاتانی دەوروبەر وەستان، بەڵام دوای وەستانی شەڕەكە، پەیتا پەیتا گەشتەكان دەستیان پێكردەوە.
