"ئاگرەکە لە کۆنتڕۆڵ دەرچووە"
زیاتر لە 10 کاتژمێرە زبڵ و خاشاکی پێنجوێن ئاگری گرتووە و نەکوژاوەتەوە
964+
کامیار کەمال – پێنجوێن
زیاتر لە 10 کاتژمێرە ئەو شوێنەی لە پێنجوێن زبڵ و خاشاکی تێدا کۆدەکرێتەوە، ئاگری گرتووە و دوکەڵ و بۆنێکی ناخۆش بەشێکی پێنجوێنی گرتووەتەوە.
رەئوف رەشید سەرۆکی شارەوانی پێنجوێن بە 964ـی وت، “تائێستا هۆکاری کەوتنەوەی ئاگر لەو شوێنە بەوردی نەزانراوە، بەڵام پێدەچێت یان بەهۆی فشار و گەرماوە، هەندێک ئامێر و کەرەستەی فڕێدراو تەقیبن و یانیش کەسێک شوێنەکەی ئاگردابێت”.
ئاماژەی بەوەشکرد، بەپێی یاسا ئاگردانی ئەو شوێنە قەدەغەیە، چونکە دەکرێت جێگای مەترسی بێت بۆ دانیشتووان و مادەی زیانبەخش بەهەوادا بڵاو ببێتەوە.
“ئاگرەکە لە کۆنترۆڵ دەرچووە و کوژاندنەوەی زەحمەت بووە، بەشێکی زۆری خۆڵە عەمەلەکەی پێنجوێنیش سووتاوە و ئاگرەکە تەشەنەی کردووە”، رەئوف رەشید وای وت.
ئەو شوێنەی زبڵ و خاشاکی پێنجوێنی تێدا کۆدەکرێتەوە، کەوتووەتە سەر رێگای خێرای باشماخ و کەمتر لە کیلۆمەترێک لە سەنتەری قەزاکەوە دوورە.
پێداچوونەوە؛ شۆڕش قادری
ئاگر زیاتر لە هەزار دۆنمی دوو گوندی پێنجوێنی سووتاند
