لەسەر رێگای دهۆک - زاخۆ
لە رووداوێکی هاتوچۆدا کەسێک گیانی لەدەستدا و شەشی دیکەش بریندارن
964+
شڤان عەبدوڵا – زاخۆ
لە رووداوێکی سەختی هاتوچۆدا لەسەر رێگای دهۆک – زاخۆ، کەسێک گیانی لەدەستدا و شەشی دیکەش بریندارن.
ئەمیر عەلی، وتەبێژی تەندروستی زاخۆ بە 964ـی وت، “درەنگانی شەوی رابردوو لەسەر رێگای دهۆک بۆ زاخۆ، نزیک کومەڵگەی حەسەن ئاڤا ئۆتۆمبێلێکی جوری ئۆپڵ لەژێر کۆنتڕوڵی شۆفێرەکەی دەرچووە و بەر ستونێکی کارەبا کەوتووە و دواتر چووەتە ناو چاڵێک”.
“لە ئەنجامی ئەو رووداوە شۆفێری ئۆتۆمبێلەکە گیانی لەدەستداوە و شەش کەسی دیکەش برینداربوون، کە بە نەتەوە تورکمان و عەرەبن”، ئەمیر عەلی وای وت.
ئاماژەی بەوەشکرد، لەبەر سەختی رووداوەکە، تیمەکانی بەرگری شارستانی و پۆلیس و تەندروستی، نزیکەی 40 خولەک سەرقاڵی دەرهێنانی تەرمی شۆفێری ئۆتۆمبێلەکە و گواستنەوەی بریندارەکان بوون.
ئەمیر عەلی وتیشی، تەرمی شوفێرەکە رەوانەی پزیشکی دادی دهۆک کراوە و یەکێک لە بریندارەکانیش بەهۆی سەختی برینەکەی رەوانەی نەخۆشخانەکانی دهۆک کراوە.
پێداچوونەوە؛ شۆڕش قادری
لە سێ رووداوی هاتوچۆدا منداڵێک گیانی لەدەستدا و شەش کەسیش برینداربوون
