موچەی چەند مانگێکی فەرمانبەرانی گرێبەست دابەش دەکرێت

ئەرسەلان عەبدوڵا

وەزارەتی دارایی هەرێمی كوردستان رایگەیاند، پاڵپشت بە بڕیاری ئەنجومەنی وەزیران ژمارە 279 لە رۆژی 19.3.2025 تایبەت بە راسپاردنی وەزارەتی دارایی و ئابووری بە هەماهەنگی لەگەڵ سەرۆکایەتی دیوانی ئەنجومەنی وەزیران بۆ چارەسەرکردنی گرفتی ئەو فەرمانبەرانەی ساڵی 2024 بە شێوەی گرێبەست و هەمیشەیی لەسەر میلاکی دامەزراوەکانی حکومەتی هەرێم دامەزراون، بەڵام بەهۆی ئەوەی لەناو لیستی موچەی فەرمانبەرانی هەرێمی کوردستان، کە مانگانە دەچێتە بەغدا و قبوڵ نەکراون و ماوەی چەند مانگێکە شایستەکانیان بۆ خەرج نەکراوە، لەو بارەیەوە چەند بڕیارێک لەسەر میکانیزم و شێوازی پێدانی شایستەکانیان درا بەم شێوەیە.

1- رۆژی چوارشەممە (28 ی ئایاری 2025 ) موچەی مانگی نیسانی ساڵی 2025 ی سەرجەم ئەو فەرمانبەرانە لە سەرتاسەری هەرێمی کوردستان دابەش دەکرێت.

2-هاوکات موچەی مانگەکانی (3.4.5.6.7 ) ساڵی 2024 سەرجەم ئەو فەرمانبەرانەش دابەش دەکرێت کە لەو مانگانە دامەزراون و شایستەکانیان بۆ خەرج نەکراوە.

3- لە مانگەکانی داهاتوودا لەگەڵ خەرجکردنی موچەی مانگانەیان قۆناغ بە قۆناغ ئەو موچانەشیان بۆ خەرج دەکرێتەوە، کە لە ساڵی رابردووەوە تا ئێستا پێیان نەدراوە.

4-ل ە مانگی داهاتووەوە سەرجەم ئەو فەرمانبەرانە مانگانە لەگەڵ مامۆستایانی گرێبەستی وەزارەتی پەروەردە و خوێندنی باڵا موچەکانیان بۆ خەرج دەکرێت کە تێکڕای تەمویلەکەیان لەسەر داهاتی ناوخۆیە.