دیسان رووداوى هاتوچۆ؛ گیانلەدەستدانى لێکەوتەوە

هێڤی دێوالی-دهۆک

دیسان رووداوێکى دیکەى هاتوچۆ روویدا و گیانلەدەستدان و برینداریشى لێکەوتەوە,

رووداوەکە لە مەفرەقى ناحیەى کەلەکچى کەمێک لەمەوبەر روویداوە، بەهۆیەوە کەسێک گیانى لەدەستداوە و براکەشى بەسەختى بریندارە.

رووداوەکە لە نێوان بارهەڵگرێک و ئۆتۆمبێلێکى تایبەت روویداوە، بەهۆیەوە کەسێک بەناوى ئەیمەن جەلال کە دانیشتووى گوندى پیربووبە گیانى لەدەستداوە و تەرمەکەشى رەوانەى پزیشکى دادى شێخان کراوە، براکەشى کە لە رووداوەکەدا بریندار بووەـ رەوانەى فریاکەوتنى شێخان کراوە و لەژێر چاودێرى پزیشکیدایە.

لەسەر رووداوەکە دڵشاد محەمەد، وتەبێژی هاتوچۆی قەزای شێخان بە964ـی وت،”روداوەکە لە مەفرەقی ناحیەی کەلەکچی روویداوە و گەنجیکی تەمەن 20ساڵ گیانی لەدەستداوە و برایەکەش بەسەختی بریندار بووە”.

دەشڵێت: دواى توێکارى، تەرمى کەسەکە رادەستى کەسوکارى دەکرێتەوە.

ئەو رووداوە لە کاتێکدایە، ئێوارەى ئەمڕۆ لە سەر رێگاى دەربەندیخان بۆ کەلار، رووداوێکى سەختى هاتوچۆ روویدا و بەهۆیەوە سێ گەنج گیانیان لەدەستدا و دوو کەسیش بریندار بوون.

پێداچوونەوە: وریا فەتاح