"زیاتر لە 36 کەس دەستبەسەر کراون"
رێگرییەکان لە ئاودانی بەرووبوومی کشتوکاڵی بە ئاوی پیس بەردەوامە
964+
عەبدولعەزیز خالند – هەولێر
رێگرییەکان لە ئاودانی بەرووبوومی کشتوکاڵی بە ئاوی پیس لە هەولێر بەردەوامە و تا ئێستاش زیاتر لە 36 کەس لەسەر ئەو پرسە دەستبەسەر کراون و لێپێچینەوەیان لەگەڵدا کراوە.
هێمن سەیدموراد بەڕێوەبەری گشتی کشتوکاڵی هەولێر بە 964ـی وت، “رێگرییەکانمان لە ئاودانی بەرووبوومی کشتوکاڵی بە ئاوی پیس بەردەوامە و بەهەموو شێوەیەک رێگری لەو جۆرە ئاودانە دەکەین، تا ئێستاش زیاتر لە دوو هەزار دۆنم زەویمان خاوێن کردووەتەوە”.
ئاماژەی بەوەشکرد، لەبەر ئەوەی رێڕەوی ئاوی پیس لە دەورووبەری شاری هەولێر دوور و درێژە و زیاتر لە 12 کیلۆمەترە، کۆنتڕۆڵ کردنی ئەو بابەتە قورسە، بۆیە دەبێ لەلایەن هاوڵاتیانەوە هاوکاری بکرێن.
“تا ئێستا زیاتر لە 36 کەس لەسەر ئەو بابەتە دەستبەسەر کراون و لێپێچینەوەیان لەگەڵدا کراوە”، هێمن سەیدموراد وای وت.
باسی لەوەشکرد، هەرچەندە بەرووبوومی کشتوکاڵی بە ئاوی پیس زیاتر گەشە دەکات وەک ئاودانی بە ئاوی خاوێن، بەڵام لەڕووی تەندروستییەوە کاریگەری خراپی هەیە و شیاو نابن بۆ خواردن.
پێداچوونەوە؛ شۆڕش قادری
ئەو كێڵگانەی سەوزەیان بە ئاوی پیس دەچاند بە شۆفڵ تێكدران
