سێ تاوەری هێڵەکانی پەیوەندی ترسی لای خەڵکی سۆران دروستکردووە

ژووری هەواڵ

دانیشتووانی سێ گەڕەکی سۆران دەترسن سێ تاوەر مەترسی هەبێت بۆ تەندروستیان، لەبەر ئەوە سکاڵایان تۆمار کردووە و داوای لابردنیان دەکەن.

ئەمڕۆ دووشەممە 5.5.2025، هەژار ماهیر، بەڕێوەبەری فەرمانگەی ژینگەی سۆران بە 964ـی راگەیاند، له‌سه‌ر داواكاری هاوڵاتیان و دوای ئاراسته‌كردنی گله‌یی و گازنده‌یان، تیمی پشكنین و چاودێری و هۆبه‌ی تیشك سه‌ردانی سێ تاوه‌ر له‌ گه‌ره‌كه‌كانی زانیاری و وه‌ستا ره‌جه‌ب و دێلزیان له‌ قه‌زای ناوه‌ندی سۆران و ناحیه‌ی دیانایان كرد به‌ مه‌به‌ستی پشكنین.

بەگوێرەی رێنماییە ژینگەییەکان، دەبێت دووری تاوەرەکان لە شوێنە گشتییەکانەوە لە 50 مەتر کەمتر نەبێت، بەڵام لەدوای پشکنین دەرکەوتووە کە تاوەرەکان نزیکن لە نەخۆشخانەیەکی لەدایکبوون و بنکەیەکی تەندروستی.

بە وتەی بەڕێوەبەری فەرمانگەی ژینگەی سۆران، ئەگەر لە دانانی تاوەرەکاندا رەچاوی رێنماییەکانی ژینگە نەکرابێت، دەبێت خاوەنەکانیان بەگوێرەی یاسای ژمارەی هەشتی ساڵی 2008 سزا بدرێن و بەند بکرێن بۆ ماوەی یەک مانگ و سزای پێبژاردنیان بۆ بکرێت بە بڕی 150 بۆ 200 ملیۆن دینار.