یەکێک لە باڵەخانە رووخاوەکان - social media
گەشتی دەرەوەی تورکیایان لێ قەدەغە کراوە
فەرمانی دەستگیرکردن بۆ زیاتر لە 100 وەبەرهێن دەردەچێت
964+
پێشەوا محەمەد – سلێمانی
فەرمانی دەستگیرکردن بۆ زیاتر لە 100 وەبەرهێنەری خانووبەرە لەتورکیا دەرچووە و چەند وەبەرهێنەرێکیش دەستگیرکراون.
بوومەلەرزەکەی 6.2.2023 باکوور و رۆژئاوای کوردستان کە تائێستا زیاتر لە 30 هەزار گیان لەدەستدان و 90 هەزار برینداری لێکەوتووەتەوە، دەرگای لەسەر بەدواداچوون بۆ پڕۆژەکانی نیشتەجێبوون لەو وڵاتە کردەوە.
بەکر بۆزداغ، وەزیری دادی تورکیا رۆژی هەینی رابردوو رایگەیاند: لیژنەیەکیان پێکهێناوە و پێداچوونەوە بە سەرجەم پڕۆژەکانی نیشتەجێبوون دەکەن.
ئاماژەی بەوەش دابوو، هەر وەبەرهێنەرێک کەمتەرخەمی کردبێت دەستگیردەکرێت و تا کۆتایی بەدواداچوونەکەش گەشتکردنی دەرەوەی وڵات لەسەرجەم وەبەرهێنەکان قەدەغە کراوە.
بەپێی زانیارییەکانی هەریەک لە رۆژنامەی سەباح و حورییەتی تورکی، زیاتر لە 100 وەبەرهێن فەرمانی دەستگیرکردنیان بۆ دەرچووە.
بەپێی دوایین ئامار کە وەزیری داد بڵاویکردەوە، شەش هەزار و 640 باڵەخانە و 87 هەزار و 857 خانووبەرە رووخاون و زیانیان بەرکەوتووە.
محەمەد یەشار، حەسەن ئالپارگوون، ئیبراهیم مستەفا ئنجوئۆغڵو و یاوز کاراکوش بەشێکن لە وەبەرهێنەرە دەستگیرکراوەکان و هەندێکیان لە کاتی هەوڵدانیان بۆ چوونەدەرەوە لە تورکیا دەستگیر کراون.