بڵاوبوونەوەى جۆرە نەخۆشییەک لە نێو مەڕوماڵاتى پارێزگاى میسان
چاویان سور دەبێتەوە و پێستیان دەڕوشێت
نەخۆشییەک لە نێو مەڕوماڵاتی پارێزگایەکی عێراقدا بڵاوبووەتەوە
964+
وریا فەتاح
وەزارەتى ژینگەى عێراق، جۆرە نەخۆشییەکى لە نێو مەڕوماڵاتى ناوچەیەکى پارێزگاى میسان راگەیاند، دەشڵێت: ژمارەیەکیان مردار بوونەتەوە.
پلەى گەرمى لەشیان بەرز دەبێتەوە و ئارەزووى خواردنیان نامێنێت و دەڕشێنەوە، ئەوە جگە لە رووشانى بەشێکى پێستیان
وەزارەتەکە بڵاوى کردووەتەوە، لە وەڵامى سکاڵاى هاوڵاتیان و ئاژەڵدارانى گەڕەکى ئیمام موساى کازم لە پارێزگاى میسان، ژینگەى میسان سەردانى ناوچەکەى کردووە و لەگەڵ خاوەن ئاژەڵەکان کۆبوونەتەوە و چاویان بە ئاژەڵە نەخۆشەکان کەوتووە.
هەروەک باسى کردووە، ئاژەڵەکان توشى نەخۆشییەک بوون کە چەند نیشانەیەکیان لەسەرە، لەوانە( بەرزی پلەی گەرمی، نەمانی ئارەزووی خواردن، سوربوونەوەی چاو، رووشانی پێست و رشانەوە و ریخاندن).
هەرچەندە هیچ زیانێکى گیانى بۆ بەخێوکەران و ئاژەڵداران نەبووە کە پەیوەندیان لەگەڵ ئاژەڵە نەخۆشەکان هەبووە، بەڵام مردنى دووبارە لە نێو گامێش و مەڕەکاندا تۆمارکراوە و ئاژەڵەکانى تر نەمردوون.
ژینگەى میسان لە ئەنجامى سەردانەکەیان راپۆرتێکی تەکنیکی ئامادەکردووە کە ئاراستەی لایەنە پەیوەندیدارەکان کراوە لە ئەنجوومەنی پارێزگا و بەشی ڤێتێرنەری و کشتوکاڵ، بە ئامانجی گرتنەبەری رێوشوێنی پێویست و چاودێری وردی دۆخەکە بەتایبەتی لەبەر رۆشنایی بەردەوامی تێکەڵکردنی ئاژەڵە تووشبوو و تەندروستەکان.
