هێشتا رێژەی كوشتنی ژنان لە هەرێمی كوردستان بەرزە
ئەمڕۆ 8ی مارسە
80 ساڵ بەسەر رۆژی جیهانیی ژنان تێدەپەڕێت
964+
ئەرسەلان عەبدوڵا
ئەمڕۆ 8ی ئادار “مارس”، رۆژی جیهانیی ژنانە و 80 ساڵ بەسەر دیاریكردنی ئەو رۆژە نیشتمانییە بۆ ژنان تێپەڕێت.
رۆژەكە بۆنەیەكی جیهانییە و وەك ئاماژەدان بە رێزگرتن و پێزانین و خۆشەویستی گشتی بۆ ژنان دیاریی كراوە.
لە هەندێك وڵاتی كۆمۆنیستی وەك چین و كۆبا و روسیا، بۆ دەستکەوتە ئابووری و سیاسی و کۆمەڵایەتیەکانییان، ژنان لەم رۆژەدا مۆڵەت وەردەگرن و ئاهەنگ دەگێڕن.
ئاهەنگگێڕانی ئەم بۆنەیە دوای ئەوە هات، کە یەکەمین کۆنفرانسی یەکێتیی دیموکراتی ژنانی نێودەوڵەتی لە پاریس لە ساڵی 1945 بەڕێوەچوو، وەك دەزانرێت یەکێتیی دیموکراتیی نێودەوڵەتیی ژنان لە رێکخراوەکانی سەر بە حزبە کۆمۆنیستەکان پێکدەهات و یەکەمین ئاهەنگی جیهانیی رۆژی جیهانی ژنان بوو، هەرچەندە هەندێک لە لێکۆڵەران پێیان وایە رۆژی جیهانیی ژنان لە ئەنجامی هەندێک مانگرتنی ژنان بووە کە لە ئەمریکا روویانداوە.
رۆژی جیهانیی ژنان لە سەرانسەری جیهاندا بە شێوازی جۆراوجۆر بەڕێوەدەچێت؛ لە زۆرێک لە وڵاتان بە پشووی فەرمی دادەنرێت، لە هەندێکی تردا لە رووی کۆمەڵایەتی یان ناوخۆییەوە بەڕێوەدەچێت، نەتەوە یەکگرتووەکان لە پەیوەندی لەگەڵ پرسێکی دیاریکراوی مافەکانی ژناندا، هەڵمەتێکی دیاریکراو، یان بابەتێکی دیاریکراودا ئەم جەژنە دەبێت.
هەروەها لە هەندێ ناوچەی جیهاندا رۆژی جیهانیی ژنان هێشتا رەنگدانەوەی سەرچاوە سیاسییەکانی خۆیەتی، بە ناڕەزایەتی و داوای گۆڕانکاری ریشەیی تایبەتمەند، ژنان رێپێوان دەكەن، لە ناوچەی تریشدا، بە تایبەتی لە رۆژئاوا، تا رادەیەکی زۆر کۆمەڵایەتی و کولتوورییە و زیاتر لە ئاهەنگگێڕانی ژنان بەم بۆنەیە دەردەكەوێت.
لە هەرێمی كوردستانیش یادەكە دەكرێتەوە و لە لایەن رێكخراوەكانی ژنان و چالاكوانان بۆنە و رێوڕەسمی تایبەت رێكدەخرێت، بەڵام ئەوەی جێی نیگەرانیی ژنانی كوردستان و هەروەها رێكخراوە نێودەوڵەتییە چاودێرەكانی رەوشی مافی مرۆڤە، هێشتا رێژەی كوشتنی ژنان لە هەرێمی كوردستان بەرزە.
