دیمهنێكی ناو سهنتهرى ئیدارهى سهربهخۆى سۆران.
"ئیدارەی سەربەخۆی سۆران"
پێشكەشكردنی خواردن و خواردنەوە لە دامودەزگا فەرمییەكان قەدەغەیە
964+
ئەرسەلان عەبدوڵا
ئیدارەی سەربەخۆی سۆران رایگەیاند، لە مانگی رەمەزانی پیرۆزدا لە ناو فەرمانگەكاندا هیچ جۆرە خواردن و خواردنەوەیەك پێشكەش ناكرێت، داواش لە كەناڵە تەلەڤزیۆنییەكانیش دەكەن پابەندی دابونەریت و پیرۆزیی مانگی رەمەزان بن.
ئیدارەی سەربەخۆی سۆران، بەبۆنەی هاتنەوەی مانگی رەمەزانی پیرۆز، چەند رێنماییەكی بۆ سنووری دەسەڵاتی خۆی دەركردووە، كە بەشێكیان ئەمانەن:
1- پێویستە چێشتخانە و کافیتریا و دوکان و بازاڕەکان، رەچاوی حورمەتی ئەم مانگە پیرۆزە بکەن و هەستی رۆژووەوان بپارێزن.
2- لەم مانگە پیرۆزەدا ھیچ جۆرە خواردن و خواردنەوەیەک لە دامودەزگا فەرمییەکان پێشکەش ناکرێت.
3 – پێویستە گشت کەناڵەکانی راگەیاندن تایبەتمەندی و پیرۆزیی ئەم مانگە لەبەرچاو بگرن، شتێک بڵاونەکەنەوە کە لەگەڵ گەورەیی و پیرۆزیی ئەم مانگە نەگونجێت.
4- رێنمایی تایبەت بە مزگەوت و مامۆستایانی ئایینی لە وەزارەتی ئەوقاف و کاروباری ئایینی دەرچووە، پێویستە ھاوکاریی تەواو بکرێت بۆ جێبەجێکردن و پراکتیزەکردنی ناوەڕۆکی.
5- ھەر مەراسیمێکی تایبەت بەم مانگە ئەنجام بدرێت، لە سەرجەم پارێزگا و ئیدارە سەربەخۆکان و قەزا و ناحیەکان، پێویستە لە ژێر چاودێریی وەزارەتی ئەوقاف و کاروباری ئایینی/ یان بەڕێوەبەرایەتییە گشتییەکان/ بەڕێوەبەرایەتییەکانی ئەوقاف بێت.
6- داواکارین لە لایەنە پەیوەندیدارەکانی پارێزگاکان و یەکە ئیدارییە سەربەخۆکان سەرپەرشتی و بەدواداچوونی جددی بۆ جێبەجێکردنی ئەم رێنماییانە بکەن.
7- دەزگاكانی راگەیاندن لە کاتی پێشکەشکردنی بابەتی ئایینی، دەبێت کەسێکی پسپۆڕ لە بواری ئایینی و مامۆستایانی ئایینی، کە بە فەرمی کاردەکەن میوانداریی بکرێن.
