لە گوندێکی داقوق
هاوەن کەوتەناو حەوشەی ماڵێک و دایکێک گیانی لەدەستدا
964+
کاروان ساڵحی – کەرکوک
لە گوندێکی داقوق گولـلە هاوەن کەوتەناو حەوشەی ماڵێک و دایکێک گیانی لەدەستدا.
رووداوەکە کاتژمێر 10ـی شەوی رابردوو و لە گوندی مەڵحە روویداوە.
سەرچاوەیەکی تایبەت لە ناو سوپای عێراق بە 964ـی وت، “هاوەنەکە کەوتووەتە ناو ماڵی هاوڵاتییەک کە لە دەرەوەی گوندی مەڵحە سەرقاڵی کاری ئاژەڵدارین، بەهۆیەوە ژنی ماڵەکە بەسەختی برینداربووە و رەوانەی نەخۆشخانەی رەشاد کراوە، سەرەڕای هەوڵی زۆری پزیشکان و کارمەندانی نەخۆشخانە، بەڵام بەهۆی سەختی برینەکەی گیانی لەدەستداوە”.
ئاماژەی بەوەشکرد، هیچ جموجوڵێکی چەکدارانی داعش لەو سنوورە نییە، دەستیان بە لێکۆڵینەوە کردووە بۆ ئاشکراکردنی شوێنی هاویشتنی گولـلە هاوەنەکە.
پێداچوونەوە؛ شۆڕش قادری