حاسڵاتی پرۆسەی ئاشتی
پەیامەکە بە ڤیدیۆیە.. تەلەفۆنەکەی دەمیرتاش و سێ مانگە یەکلاکەرەوەکە
964+
ژووری هەواڵ
تائێستا هەموو شت بەو ئاڕاستەیە دەڕوات کە پڕۆسەی ئاشتی لە تورکیاو باکوری کوردستان بکەوێتە سەر پێی خۆی، فەرموون بە خێرایی ئەمە حاسڵاتی زانیارییە گرنگەکانی پەیوەست بەو پرۆسەیەیە
– ماڵپەری خەبەر تورک بڵاویکردەوە: دەوڵەت باخچەلی سەرۆکی پارتی بزوتنەوەی نەتەوەیی تورکیا بە تەلەفۆن قسەی لەگەڵ سەڵاحەدین دەمیرتاش، هاوسەرۆکی پێشووی هەدەپە کردووەو سوپاسی دەمیرتاشی کردووە کە پاڵپشتی پرۆسەی ئاشتییە.
– تولاى حاتیم ئۆغڵولاری هاوسەرۆکی دەم پارتی رایگەیاند: کۆبوونەوەکەی ئەم دواییەیان لەگەڵ ئۆجەلان چوار کاتژمێری خایاندووەو هەمووی بە ڤیدیۆ تۆمارکراوە، لەوێ ئۆجەلان بە روونی پەیامەکەی باسکردووە.
– سرەی سورەیا جێگری سەرۆکی پەرلەمانی تورکیا و ئەندامی شاندی ئیمرالی رایگەیاند: لە هەفتەی داهاتووەوە دەست بە کۆبوونەوەکان دەکرێت و بە سێ مانگی هەموو شتێک لە بارەی پرۆسەی ئاشتییەوە یەکلادەبێتەوە.
– فەرماندەیی بڕیارگەی ناوەندی پاراستنی گەل (نەپەگە) راگەیەندراوێکی بڵاوکردووتەوەو دەڵێت ئەوانیش وەکو هەموو هێزە چەکدارەکانی سەر بەپەکەکە بە تەواوی پابەندن بە ئاگربەستەوە.
– پارتی ژیانی ئازادیی کوردستان (پژاک) رایگەیاند: بە هەموو شێوەیەک پشتیوانیی خۆمان لە بانگەوازو دەستپیشخەرییەکەی ئاپۆ بۆ دەستەبەربوونی ئاشتی بەردەوام لە تورکیا رادەگەیەنین.
– ئەنجومەنی دایکانی ئاشتی لە ئامەدو مێرسین کۆبوونەوەو پشتیوانی خۆیان بۆ سەرخستنی پرۆسەی ئاشتی راگەیاند: ئەوان دەڵێن رەنگی فرمێسکی چاوی دایکان لە هەردوولای شەڕەکە وەک یەکە.
– لە کوردستان و لە عێراقیش دەنگێکی جدی پەیدا بووە دەڵێن مادام پرۆسەی ئاشتی راگەیەندراوە هیچ بیانوویەک نەماوە بۆ مانەوەی هێزەکانی تورکیا لە خاکی هەرێمی کوردستان و دەبێت بکشێنەوە.
– رۆژنامەی حورییەت بڵاویکردەوە رەجەب تەیب ئەردۆغان لە ئێوارەخوانێک بۆ کەسوکاری سەربازە کوژراوەکان رایگەیاندووە: ئەگەر پێویست بکات درێژە بە ئۆپەراسیۆنە سەربازییەکەمان دەدەین دژی پەکەکە.
– تائێستا تورکیا لەلای خۆیەوە پابەندنەبووە بە ئاشتییەوە، بەرەبەیانی ئەمڕۆ لە چیای لینکێ لە ناحیەی دێرەلووکی پارێزگای دهۆک تورکیا بە کۆپتەر هێرشی کردووەتە سەر چەکدارانی پەکەکە.
– بەپێی زانیارییەکانی رێکخراوی دروستکردنی ئاشتی لە کۆمەڵگا (CPT): لە رۆژی 27ی شوباتەوە، واتە لەو کاتەوەی ئۆجەلان پەیامەکەی راگەیاندووە: تورکیا هەشتجار هێرش و بۆردومانی بۆ سەر ناوچە جیاجیاکانی هەرێمی کوردستان ئەنجام داوە.
" ئەرکى هەمووانە پێشوازى لە پەیامەکەى ئۆجەلان بکەین"
