پۆلیس: هەڕەشەیان لە ژنان کردووە
دوو کەس لە گروپی “راوچی کۆیلەکان” دەستگیرکران
964+
ئەحمەد مستەفا
پۆلیسی هەولێر دەڵێ، گروپی راوچی کۆیلەکانمان دەستگیرکرد، لە دیمەنێکی ڤیدیۆیی کە بڵاوی کردووەتەوە، دەردەکەوێ ئەوان دوو کەسن، کەلەپچە لەدەستیانە و جلی رەشیان لە بەردایە.
ئەم کەسانە، لە تۆڕە کۆمەڵایەتییەکان و تایبەت تەلەگرام چالاکییان هەبووە، بە گوێرەی ئەو رۆڵەی هەیان بووە، بەشداربوون لە بڵاوکردنەوەی وێنە و دیمەنی خەڵک.
ئەمڕۆ شەممە 15.2.2025، بەڕێوەبەرایەتی پۆلیسی پارێزگای هەولێر لە بڵاوکراوەیەکدا کە 964 بینوویەتی دەڵێت، گروپی “راوچیی کۆیلەکان”ی دەستگیرکران، کە ئەم گرووپە تاوانی ئەلیکترۆنییان ئەنجام دابوو و هەڕەشەی بڵاوکردنەوەی وێنە و ڤیدیۆی نەشیاویان لە ژنان کردبوو.
بە قسەی پۆلیس، تۆمەتبارەکان، کە یەکێیان خەڵکی سنووری قەزای سۆرانە و بە هاوکاریی بەڕێوەبەرایەتی پۆلیسی سۆران دەستگیر کران، دانیان نا بە تاوانەکەیاندا، بۆیە دۆسیەی لێکۆڵینەوەیان بۆ کراوەتەوە و بە بڕیاری دادوەری لێکۆڵینەوە دراونەتە دادگا.
