لە کەرکوک
بە شەش کەسەوە لە ژنە پزیشکێک و دوو کارمەند دەدەن
964+
کاروان ساڵحی-کەرکوک
لە گەڕەکێکی کەرکوک هێرشدەکرێتە سەر کلینیکێکی تیشک و سۆنەر، بەوهۆیەوە ژنە پزیشکێک و دوو کارمەندی کلینیکەکە بریندار دەبن.
رووداوەکە لە گەڕەکی حەجاج بووە و هێرشکارەکان شەش کەس بوون و چوونەتە تەلاری جبوری.
ئەمڕۆ یەکشەممە 2.2.2025، سائر عەزیز، شایەتحاڵ لە شوێنی رووداوەکە بە 964ـی وت، پزیشکەکە سەرقاڵی پشکنینی نەخۆشێک بووە، کەسێک خۆی کردووە بە ژورا و پزیشکەکە پێی وتوە “برا لەدەرگا بدەی باشترە بەر لەوەی بێیتە ژورەوە”، لەسەر ئەوە بووەتە دەمەقاڵێ و سەرەتا کەسەکە شوێنەکەی جێهێشت.
سائر وتیشی، دوای کەمتر لە نیو کاتژمێر، بە شەش کەسەوە هێرشیان کردووەتە سەر کلینیکەکە و بەشەق و بۆکس کەوتوونەتە سەر ژنە پزیشکەکە و دوو کارمەندەکە، دەست و ئەژنۆ و دەموچاویان بریندار کراوە و گواسترانەوە بۆ نەخۆشخانە.
سەرچاوەیەک لە بنکەی پۆلیسی میقداد بە964ـی وت، دوای راپۆرتی پزیشکی و فەرمانی دادوەر دەربارەی رووداوەکە دەستکراوە بە لێکۆڵینەوە و بەدواداچون لە رێگای کامێراکانی چاودێرییەوە بۆئەوەی هێرشکارەکان دەستگیربکرێن.
پێداچوونەوە: هاوبەش
