بەفربارین لە مەرزى کێلێ...وێنە: 964+
ئەگەر ئەمشەو نەبارێت سبەى دەبێتەوە
بەفر هاتوچۆى لە مەرزى کێلێ_وە پەکخستووە
964+
وریا فەتاح
بەهۆى بەفرەوە هاتوچۆى گەشتیارى لە مەرزى کێلێ_وە پەکى کەوتووە، بە وتەى بەڕێوەبەرى گومرگى راپەڕین، تیمى پاککردنەوەیان ناردووە، ئەگەر ئەمشەو نەبارێت، سبەینێ هاتوچۆ ئاسایى دەبێتەوە.
عەباس عەزیز:
رۆژانە 150 بۆ 250 بارهەڵگر لە مەرزى کێلێوە هاتوچۆ دەکەن و 800 بۆ 1000 کەسیش لە نێوان هەرێم و ئێران، دێن و دەچن
لە دوێنێوە بەفرێکى زۆر لە رێگاى مەرزى کێلێ باریوە و هاتوچۆى گەیشتن بە مەرزەکەى بە تەواوەتى پەکخستووە.
عەباس عەزیز، بەڕێوەبەرى گومرگى راپەڕین بە 964ـى وت،”بەهۆى بەفرەکەوە ئەمڕۆ هاتوچۆ نەکراوەو لە ئێوارەوە تیمەکانى پاککردنەوە دەنێرن بۆ ئەوەى بۆسبەینێ ئامادەى بکەن و ئەگەر ئەمشەو نەبارێت، سبەینێ هاتوچۆ ئاسایى دەبێتەوە”.
وەک ئەوەى باسى دەکات، ئەمڕۆ بە تەواوەتى هاتوچۆ نەکراوە و دوێنێش بۆ ماوەیەک هاتوچۆ هەبووە و دواتر بەهۆى بەفرەکەوە بە تەواوەتى داخراوە.
مەرزى کێلێ، مەرزێکى نافەرمییە لە نێوان هەرێمى کوردستان و وڵاتى ئێران، بە دیاریکراوى لە دیوى هەرێمى کوردستان دەکەوێتە سنوورى قەزاى پشدەر و لە دیوى رۆژهەڵاتى کوردستانیشەوە نزیکترین شار لێیەوە سەردەشتە.
