بوو بە 153 هەزار
موشەکەکانی ئێران بۆسەر ئیسرائیل نرخی دۆلاری فڕاند
964+
توانا نەقی
دوابەدوای هێرشەکانی ئێران بۆسەر ئیسرائیل و موشەکبارانکردنی ئەو وڵاتە نرخی دۆلار فڕی و ئێستا لە هەولێر 100 دۆلار گەیشتووەتە 153 هەزار دینار.
کەیفی خۆشناو وتەبێژی بازاڕی دراوی هەولێر بە 964ـی وت، یەکسەر دوای ئەو هێرشانە بەهای دۆلار بەرامبەر دیناری عێراقی زۆر بەرزبووەتەوە و نازانن تا بەیانی دەگات بەچەند.
وتیشی، ئێستا بەهای 100 دۆلار گەیشتووەتە 153 هەزار دینار ئەگەر تا بەیانی هیچ گرژیەک لە عێراق دروست نەبێت ئەوە وەک ئێستا دەمێنێتەوە وە بە پێچەوانەشەوە زۆر زیاتر بەرز دەبێتەوە.
کەیفی خۆشناو ئاماژەی بەوەکرد، ئەمڕۆ بانکی ناوەندی 255 ملیۆن دۆلاری خستووەتە بازاڕەوە کە تەنیا 5 ملیۆنی بەشێوەی کاش بووە، بەڵام بەهۆی ئەم گرژیانەوە نازانن سبەینێ چەند دەخاتە بازاڕەوە و تاچەند کاریگەری لەسەر بەهای دۆلار دەبێت لەسەر دینار
ئەمشە و ئێران بە زیاتر لە 250 موشەکی بالستی هێرشی کردە سەر ئیسرائیل و دەڵێت هێرشەکان لە تۆڵەی خوێنی هەنییە و نەسەروڵایە.
