"لە شەڕێکی فرەلایەنداین"
ئیسرائیل: زۆر بە توندی وەڵامی هێرشەکی ئێران دەدەینەوە
964+
شۆڕش قادری
سوپای ئیسرائیل هەڕەشە لە ئێران دەکات و دەڵێت، زۆر بە توندی وەڵامی هێرشەکەی دەدەنەوە.
دوای موشەکبارانی تەلئەبیب لەلایەن سوپای پاسدارانی ئێران، دانیێل هەگاری وتەبێژی سوپای ئیسرائیل رایگەیاند، “ئێمە لە شەڕێکی فرە لایەنداین و لە کات و شوێنی خۆمان دیاری دەکەین کەی وەڵام بدەینەوە”.
ئاماژەی بەوەشکرد، توانای تەواومان لەبەردەستدایە بۆ وەڵامدانەوەی ئێران و سوپای ئەمریکا یارمەتی داوین بۆ خستنە خوارەوەی موشەکەکانی ئێران.
دەستەی پەخشی ئیسرائیلیش دەڵێت، وەڵامی ئەمجارەی ئیسرائیل زۆر جیاواز دەبێت و لەوانەی پێشوو ناچێت.
هاوکات رۆژنامەی نیۆیۆرک تایمزی ئەمریکی دەڵێت، “سیناریۆ قورسەکە ئەوەیە رەنگە ئیسرائیل هێرش بکاتە سەر دامەزراوە ئەتۆمییەکانی ئێران.
ئەوەش لەکاتێکدایە، بەشێک لە میدیاکانی ئیسرائیل بڵاویانکردووەتەوە کە جموجۆڵی ئاسمانی و هێڵی شەمەندەفەر لەسەرانسەری وڵاتەکە راگیراون، جارێکی دیکەش زەنگی ئاگادارکردنەوە لە ئیسرائیل لێدرا و داوا لە خەڵک دەکرێت بچنە حەشارگەکان.
ئاژانسی دەنگوباسی فارس: شەپۆلێکی دیکەی موشەک بەڕێوەیە بۆ ئسرائیل
