لە باکووری ئێران 43 کەس بە مەشروب ژەهراوی بوون و شەش کەسیان گیانیان لەدەستدا-وێنە: ئیرنا
لە ناوچە گەشتیارییەکانی باکووری ئێران
43 کەس بە مەشروب ژەهراوی بوون و شەش کەسیان گیانیان لەدەست دا
964+
شۆڕش قادری
لە ناوچە گەشتیارییەکانی باکووری ئێران، 43 کەس بەهۆی خواردنەوەی مەشروب، ژەهراوی بوون و شەش کەسیان گیانیان لەدەستدا.
ئاژانسی هەواڵی ئیرنا لە زاری رەسوڵ زەفەرمەند بەڕێوەبەری دەرمان لە زانکۆی زانستە پزیشکییەکانی مازندەران بڵاویکردووەتەوە، “ئەمڕۆ یەکشەممە 29.9.2024 بەهۆی خواردنەوە کحولییەکان 23 کەس ژەهراوی بوون و رەوانەی نەخۆشخانەی چالووس کراون”.
“لەو 23 کەسە دوو کەسیان گیانیان لەدەستداوە، 13 یان بە شێوەی سەرپێیی چارەسەریان بۆ کراوە و رەوانەی ماڵەوە کراونەتەوە و هەشت کەسیشیان گورچیلەیان بۆ شۆردراوەتە و لە نەخۆشخانە ماونەتەوە”، رەسوڵ زەفەرمەند وای وتووە.
هەر ئەمڕۆ د. محەمەد تەقی ئاشوبی سەرۆکی زانکۆی زانستە پزیشکییەکانی گیلان رایگەیاند،”20 کەس بەهۆی خواردنەوەی مەشروب ژەهراوی بوون و رەوانەی نەخۆشخانەکانی شاری رەشت کراون”.
ئاشکراشیکرد، لەو 20 کەسە، چوار کەسیان کە تەمەنیان لە نێوان 22 بۆ 40 ساڵـدایە، گیانیان لەدەستداوە و شەش کەسیشیان باری تەندروستیان ناجێگیرە و لەژێر چاودێری پزیشکیدان.
