بەهۆی تەقینەوەی کانێکی خەڵوزەوە لە ئێران 30 کەس گیانیان لەدەستداوە

توانا نەقی

لە شاری تەباسی پارێزگای خۆراسانی باشور لە ئێران کانێکی خەڵوز تەقیوەتەوە و تا دێت رێژەی بریندار و گیان لەدەستدان بەهۆیەوە زیاد دەکات و ئێستا ژمارەی ئەوانەی گیانیان لەدەستداوە گەیشتووەتە 30 کەس.

ئاژانسی فەرمی ئێران بڵاویکردەوە، بە پێی دوای ئاماری قوربانییەکانی تەقینەوەکە ژمارەی مردن لە 19 کەسەوە گەیشتووەتە 30 کەس و 17 کەسیش رەوانەی نەخؤشخانە کراون.

محەممەد عەلی ئاخوندی بەڕێوەبەری بەشی قەیرانەکانی پارێزگای خۆراسانی باشور رایگەیاند، رووداوەکە گەورەیە و تاوەکو ئێستاش بەدوای کەسانی دیکەدا دەگەڕێن و ئەگەری زیادبوونی ژمارەی بریندار و گیان لەدەستدان هەیە.

دەشڵێت، ئەم رووداوە بەهۆی خێرایی دەردانی گازی میتانی و مۆنۆکسیدی کاربۆن رووی داوە، کە وای کردووە کرێکارەکان و ئەو کەسانەی لەو شوێنەن بخنکێن

تەقینەوەی مین تەباس شەوی رابردوو کاتژمێر 9:00 بەهۆی دەردانی لەناکاوی گازی میتانی لە یەکێک لە تونێلەکانی کانگای خەڵوزی کۆمپانیای مینەر روویدا کە 69 کرێکار کاریان کردووە.

بڕیاریشە وەزیری ناوخۆی ئەو وڵاتە و سەرۆکی رێکخراوی بەڕێوەبردنی قەیرانەکانی ئێران بگەنە شوێنی رووداوەکە و لێکۆڵینەوەکانیان دەست پێبکەن.