لە شارەزوور 19 باڵندە بە زیندویەتی کە بە تۆڕێکەوە بوون ئازاد کراون

توانا نەقی

لە چەمی بێستانسووری ناحیەی عەربەت دەست بەسەر تۆڕێکی گەورەدا گیراوە کە بۆ راوی باڵندە دانراوە و توانراوە 19 باڵندەی زیندوو کە بە تۆڕەکەوە بوون ئازاد بکرێن.

ئەمڕۆ چوارشەممە، پۆلیسی دارستان و ژینگەی سلێمانی بڵاویکردەوە، مەفرەزەیەکی بنکەی پۆلیسی دارستان و ژینگەی عەربەت دەرچوون بۆ سنووری چەمی بێستانسوور، لە ئەنجامدا تۆڕێکیان بەدیکردووە کە بە درێژایی 50 مەتر و بە بەرزی نزیکەی 5 مەتر دانراوە بە چوار دارەوە.

دەشڵێت، تۆڕەکە بە مەبەستی راوکردنی باڵندە دانراوە کە 19 باڵندەی زیندوو لە جۆرەکانی ( چۆلەکە، بۆرەجڕە، فشەکڵاونە) بەتۆڕەکەوە بوون ، بەڵام هیچ کەسێک لەشوێنی رووداوەکە نەبووە.

پۆلیسی دارستان ئاماژەی بەوەکردووە، دوای ئاگادارکردنەوەی دادوەری لێکۆڵینەوەی شارەزوور تۆڕەکانیان هەڵگرتووەتەوە و باڵندەکانیشیان ئازادی ناو سروشت کردووەتەوە.

لە ئێستادا پەڕاوی لێکۆڵێنەوە بۆ ئەو کەسانەی ئەو کارەیان کردووە کراوەتەوە و بەدوایاندا دەگەڕێن.