سبەی یارییان هەیە
میشێل سەلگادۆی ئەستێرەی پێشووی ریال مەدرید گەیشتە كوردستان
964+
دیلان محەمەد
میشێل سەلگادۆی ئەستێرەی پێشووی تۆپی پێی ئیسپانیا و یانەی ریال مەدرید، ئەمڕۆ بە سەرۆكایەتی شاندی یانەی فورسان هیسپانیای ئیماراتی گەیشتە شاری سلێمانی و رایگەیاند دەوێت زیاتر لە بارەی كوردستانەوە بزانێت.
سەلگادۆ بۆ مایكی 964 قسەی كرد و رایگەیاند خۆشحاڵە بە سەردانی سلێمانی و كوردستان و ئاشكرای كرد، یەكەمجارە سەردانی كوردستان دەكات.
سەلگادۆ كە یاریزانی پێشووی ئیسپانیایە، هەروەها ئاماژە بەوە دا پێشتر داوەتی هەولێریش كراوە، بەڵام نەیتوانی سەردانی بكات و ئەمجارەش هاتووە دەیەوێت زیاتر لە بارەی تۆپی پێی كوردستان و شارەكانی كوردستان بزانێت.
سەلگادۆ سەرۆكایەتی یانەی فورسان هیسپانیای ئیماراتی دەكات و رایگەیاند، جارێك لە بەسڕە یاریی كردووە و چەند جارێكیش سەیری یارییەكانی عێراقی كردووە.
هەروەها وتی. دەزانم تۆپی پێی عێراق بەهێزە و تیپێكی باشی نێودەوڵەتی هەیە، بۆیە وتی، دەزانم ئەو خولەی كە بەشداریی تێدا دەكەین، بۆ ئێمە چاڵنجێگی گەورەیە و زەحمەتە.
بڕیارە سبەی پاڵەوانیەتیی جامی نێودەوڵەتی سلێمان بە بەشداریی هەر چوار دەستپێبكات، پێشمەرگەی سلێمانی، ئیتساڵات و گازی باكوور و یانەی فورسان هیسپانیای ئیماراتی.
پێداچوونەوە: ئەرسەلان عەبدوڵا
