دیمهنێكی كوپه‌ڵه دۆزراوهكه له ناوچهى شارباژێر ... وێنه: ده‌زگاى گشتى كاروبارى مین.
"پاره‌یه‌كی زۆرى تێدایه"
شوێنه‌وارى هه‌رێم لێكۆڵینه‌وه‌ى ورد له‌سه‌ر كوپه‌ڵه دۆزراوه‌كه‌ى شارباژێر ده‌كات
964+
فه‌رهاد حه‌سه‌ن
شوێنه‌وارى هه‌رێمی كوردستان، ده‌ستى به لێكۆڵینه‌وه‌یه‌كی ورد كردووه له‌سه‌ر ئه‌و كوپه‌ڵه دۆزراوه‌یه‌ى كه ماوه‌یه‌ك له‌مه‌وبه‌ر له‌لایه‌ن تیمه‌كانى ده‌زگاى مینه‌وه دۆزرابووه‌وه، به‌ڕێوه‌به‌رى گشتیى شوێنه‌واریش ده‌ڵێت، مه‌به‌ستمانه مێژوو و سه‌رده‌مى ئه‌م كوپه‌ڵه‌یه بزانن ئینجا، ئینجا له شوێنێكی پارێزراو دایبنێن.
كوپه‌ڵه‌كه، له رۆژی 17.7.2024 لە کاتی کارکردنی تیمەکانی کاروباری مینی سلێمانی لە کێڵگەمینێکى سنوورى شارباژێڕ دۆزراوه‌ته‌وه و شوێنه‌وارى هه‌رێمیش له رۆژى 19.8.2024 رێز و سوپاسی ئاڕاستەی بەڕێوەبەرایەتیی گشتیی ده‌زگاى مین کرد لەپای دڵسۆزی و خەمخۆریی بۆ پاراستنی شوێنەوارەکان.
كه‌یفی مسته‌فا، به‌ڕێوه‌به‌رى گشتیى شوێنه‌وارى هه‌رێم، به 964ـى راگه‌یاند تیمه‌كانیان له سلێمانى ده‌ستیان به لێكۆلێنه‌وه له‌سه‌ر ئه‌و كوپه‌ڵه دۆزراوه‌یه كردووه و ده‌یانه‌وێت مێژوو و سه‌رده‌مى كوپه‌ڵه‌كه به روونى بزانن.
وتیشی “كوپه‌ڵه‌كه پاره و سكه‌یه‌كی زۆرى تێدایه و نازانین بۆ چ سه‌رده‌مێك ده‌گه‌ڕێته‌وه، به‌شێكی سكه‌كان تێكچوون و شێواون”.
ئاماژه‌ى به‌وه‌ش كرد، پێویستیان به كاتێكی زۆره تا ته‌واوى ئه‌و پارانه خاوێن ده‌كه‌نه‌وه و مێژووه‌كه‌یان بۆ ئاشكرا ده‌بێت.
ساڵى پاریش له مانگى ئایار کوپەیەک لە ناوچەی شارباژێر دۆزرایه‌وه، كه ئه‌وكات شوێنه‌وار وتى تەمەنی بۆ نزیکەی دوو هەزار ساڵ ده‌گه‌ڕێته‌وه و مێژووەکەشی دەگەڕێتەوە بۆ سەردەمی ساسانییەکان.
كوپه‌كه كراوه بوو، هه‌ر ئه‌وكات به مه‌به‌ستى پاراستنى له مۆزەخانەی سلێمانی داندرا .
