کورسی و مێزی دانیشتن لە بازاڕێکی قەزای شارەزوور دانرا

964+

بڕوا مەجید – شارەزوور

چەند گەنجێکی قەزای شارەزوور، شوێنی دانیشتن و پشوودان بۆ خەڵکانی بەتەمەنی قەزاکە دابین دەکەن.

لە ناو بازاڕی شارەزوور، چوار شوێنی دانیشتن دابین کراوە کە پێكهاتوون لە کورسی و مێز، جگە لەوەش پەرژینێک دروست کراوە و لە رێگەی چاندنی چەند نەمامێکەوە گەنجەکان هەوڵی سەوزکردنی بازاڕەکەیان داوە.

سەبارەت بە دانانی کورسی و مێزی دانیشتنەکان، سالارئەحمەد، سەرۆکی شارەوانیی شارەزوور بۆ964 وتی “کۆمەڵێک گەنج داوایەکیان پێشکەشی شارەوانیمان کردووە و ویستویانە ناو بازاڕی هەڵەبجەییەکان رێکبخەن و شوێنی دانیشتن و کورسی و مێزی بۆ دابین بکەن لەسەر داهاتی خۆیان، ئێمەش لای خۆمانەوە هاوکاریمان کردن بەپێدانی ئامێر بۆ پاککردنەوە و رێکخستنی ئەو زەوییەی کارەکەیان تێدا ئەنجام دەدا.”

سەربەست شێخ بورهان، خاوەنی بیرۆکەکە بە 964ـی وت، “بیرۆکەی دانانی کورسی و مێزی دانیشتن لەناو بازاڕ لەوەوە سەرچاوەی گرت، رۆژانە چەندین پیاوی بەتەمەن لەناو ئەوخۆڵە و لەسەر شۆستەی گەرم دادەنیشتن و شەوانیش گەنجان جێگایەکیان نەبوو بۆدانیشتن.”

وتیشی، بە سوپاسەوە بە هاوکاری شارەوانیی شارەزوور و بە سپۆنسەری (کامیار سەرکەوت) کە گەنجێکی شارەزوورە، ئەرکی جێبەجێکردنی کارەکە بە ئێمە کە ژمارەمان پێنج گەنجە سپێردرا، پڕۆژەکەش پێکدێت لە دانانی کورسی و مێز لەگەڵ دانانی پەرژین و دروستکردنی شوێنی پەڕینەوە لەگەڵ چاندنی نەمام و سەوزایی.

پێداچوونەوە: ژێوار خدر