بڕیاری گۆڕینی كیسی نایلۆنی نانەواخانەكان بۆ زەرفی كاغەز كەی جێبەجێ دەكرێت؟

964+
ئەرسەلان عەبدوڵا

وەزارەتی تەندروستیی هەرێمی كوردستان هەفتەیەك زیاترە بڕیاری داوە چیتر سەموونخانە و نانەواخانەكان كیسی نایلۆن بەكارنەهێنن و زەرفی كاغەز بەكاربهێنن، قایمقامی هەولێریش دەڵێت، هەر بڕیارێك دەربچێت پێویستە دیراسە بكرێت.

رۆژی 27.7،2024 د. سەركار سورچی، وتەبێژی وەزارەتی تەندروستیی كوردستان بە 964ی وت، بڕیار دراوە چیتر سەموونخانە و نانەواخانەكان كیسی نایلۆن بەكارنەهێنن و دەبێت زەرفی كاغەز بۆ فرۆشتنی نان و سەموون بەكار بهێنن.
هاوكات ئەمڕۆ دووشەممە 5.8،2024 وتەبێژی وەزارەتی تەندروستی هەمان زانیاری بۆ 964 دووپاتكردەوە و رایگەیاند، بڕیارەكە گشتاندنی بۆ كراوە بۆ سەرجەم بەڕێوەبەرایەتییە گشتییەكانی سەر بە وەزارەتی تەندروستی لە شار و ئیدارە سەربەخۆكانی كوردستان، ئەوانیش لە رێگەی لیژنەكانی چاودێریی تەندروستی و بە هەماهەنگی لەگەڵ لیژنەكانی قایمقامییەتی شارەكان و ئیدارە سەربەخۆكان جێبەجێی دەكەن.

وتیشی، بە پێی بەدواداچوونی ئێمە لە هەندێك شوێن بڕیارەكە جێبەجێ كراوە و زەرفی كاغەز لە بری نایلۆن بەكاردێت، بەڵام هێشتا بە تەواوی جێبەجێ نەكراوە.

964 تێبینیی ئەوەی كردووە، لە بەشێكی زۆری نانەواخانە و فڕنەكانی هەولێر، هێشتا هەر نایلۆن بەكاردێت.

سەبارەت بە جێبەجێكردنی ئەو بڕیارە لە هەولێر، قایمقامی هەولێر نەبەز عەبدولحەمید بە 964ی وت، ئەم بڕیارە هێشتا لە هەولێر جێبەجێ نەكراوە، مەگەر خاوەن نانەواخانەیەك خۆی خۆبەخشانە جێبەجێی كردبێت”.

وتیشی، هەر بڕیارێك دەدرێت، پێویستە سەرەتا دیراسە بكرێت و بزانرێت چۆن جێبەجێ بكرێت، بە تایبەتی نەبێتە بارگرانی و خەرجی لەسەر هاوڵاتیان، بۆ ئەمەیان رەنگە نانەواخانە و سەموونخانەكان لە بری زەرفی كاغەز، نان و سەموون گران بكەن.

“هێشتا بڕە زەرفێكی پێویست لە بازاڕ لەبەردەستدا نییە و دەبێت ئەو زەرفەشی بەكاردێت لە رووی تەندروستی و كوالێتییەوە دڵنیایی تێدابێت، لەوانەیە زەرف هەبێت لە نایلۆن خراپتر بێت”، نەبەز عەبدولحەمید وای وت.

بڕیارەكە كۆنە و هێشتا جێبەجێ نەكراوە

بە پێی زانیارییەكانی 964، لە 2019 بڕیاری بەكارهێنانی زەرفی كاغەز لە بری كیسی نایلۆن لە فڕن و نانەواخانەكان دراوە، بەڵام هێشتا و سەرەڕای دووپاتكردنەوەی بڕیارەكە، بەڵام هەر نایەتە جێبەجێكردن.

بۆچی نایلۆن خراپە؟
لێكۆڵێنه‌وه‌ ته‌ندروستییه‌كان ئاماژه‌ به‌وه‌ ده‌كه‌ن، نایلۆن ماددەیەكی تێدایە بە زوویی لەگەڵ ئەو گەرمییەی كە لە سەموون و نانی تازەدا هەیە، كارلێك دەكات و زیانی تەندروستی لێدەكەوێتەوە.
به‌ پێی ئاماری رێكخراوه‌كانی ژینگه‌پارێزی له‌ جیهاندا، ساڵانە 300 ملیۆن تۆن پلاستیك له‌ جیهاندا بەرهەم دەهێندرێت.

وەزارەتی تەندروستی: بۆ دابەشکردنی گۆشتی خێر نایلۆنی روون و نوێ بەکاربهێنن