شەقامێکی دەربەندیخان . وێنە:964+
بە گوژمەی زیاتر لە سێ ملیار دینار
چەند پرۆژەیەکی ستراتیژی لە دەربەندیخان جێبەجێ دەکرێت
964+
توانا نەقی
بە گوژمەی زیاتر لە سێ ملیار دینار چەند پرۆژەیەکی ستراتیژی لە قەزای دەرەبەندیخان لە بوارەکانی ئاو و خزمەتگوزاری تەندروستی جێبەجێ دەکرێت.
قایمقامیەتی دەربەندیخان لە راگەیندراوێکدا دەڵێت، هەموو ئامادەکارییەکیان بۆ دەستپێکردنی پرۆژەکان کردووە، تەنیا ئەوە ماوە لە کاتی خۆیاندا پرۆژەکان بودجەیان بۆ تەرخان بکرت و بخرێنە خزمەتی هاوڵتیان.
سلێمان محەمەد قایمقامی دەربەندیخان بە 964ـی وت، هێشتا ئەو بڕە پارەیە لە بودجەی پەرەپێدان نەهاتووەتە سەر حسابی دەربەندیخان و بەڵام بڕیارەکەی لە ئەنجومەنی وەزیرانەوە هاتووەتەوە سلێمانی.
وتیشی، کە بۆیان خەرج کرا پرۆسەی تەندەرین دەمێنێت و چەندین کۆمپانیا ئامادەن ئەو پرۆژانە وەربگرن، پارەکەش بۆ تەاوکردنی هیچ پرۆژەیەکی رابردوو نییە، بەڵکو دەبێت پرۆژەی نوێ بێت و تازە بەردی بناغەیان بۆ دابنرێت.
پرۆژەکان گوژمەی 3 ملیار و 354 ملیۆن و 472 هەزار و 673 دیناری بۆ دانراوە و پێکهاتوون لەم پرۆژانە:
– پرۆژەی ئاوەڕۆی گەڕەکی دەرسیم تایبەت بە شارەوانی دەربەندیخان بە بڕی 1 ملیار و 283 ملیۆن و 750 هەزار دینار.
– پرۆژەی دروستکردنی راکێشانی هێڵی ناقل و حەوزێکی ئاو بەبڕی 1 ملیار و 220 ملیۆن و 472 هەزار دینار، تایبەت بە فەرمانگەی ئاو بەمەبەستی زیاتر بەرهەم هێنانی ئاو و دابەشکردنی بەسەر هاوڵاتیاندا.
– دروستکردن و سەرلەنوێ بنیاتنانەوەی خانەی پزیشکان لەناو نەخۆشخانەی شەهید تۆفیق بە بڕی 700 ملیۆن دینار.
– بۆ سنووری شارەوانی ناحیەی باوەخۆشێن بڕی 150 ملیۆن دینار تەرخانکراوە.
