گوندێکی سنووری ناحیەی ناڵپارێز بۆردومان کرا 

کامیار کەمال – پێنجوێن

بەیانی ئەمڕۆ چوارشەممە 17.7.2024  گوندی بادانەی سەر بە ناحیەی ناڵپارێز بۆردومان کراوە و دیار نییە فڕۆکەی بێ فڕۆکەوانە یان فڕۆکەی جەنگی.

هێمن ئیبراهیم بەڕێوەبەری ناحیەی ناڵپارێز بە 964ی راگەیاند، رووداوەکە بەیانی ئەمڕۆ کاتژمێر حەوت بووە و هیچ زیانێکی گیانیشی نەبووە.

وتیشی، بەهۆی بۆردومانەکەوە نزیکەی 50 دۆنمێک پووش و پاوان سووتاوە و لە لایەن دانیشتووانی گوندەکەوە کۆنتڕۆڵ کراوە.

ئەوەشی خستەڕوو، گوندەکە نزیکەی 15 کیلۆمەتر لە ناحیەی ناڵپارێز دوورە و نزیکەی 25 ماڵی تێدایە.

سێ رۆژ لەمەوبەریش گوندی نزارە بە فڕۆکەی جەنگی بۆردومان کرا، هاوکات لەمساڵدا ئەمە پێنجەمین جارە ناوچەی پێنجوێن بۆردومان دەکرێت و لایەنی ئەمنی و تەندروستیش دەڵێن، هیچ زیانێکی گیانی نەبووە.

پێداچوونەوە: ئەرسەلان عەبدوڵا