پێداچوونەوە بۆ بڕیاری داخستنی كامپەكان دەكرێت

ئەرسەلان عەبدوڵا

وەزیری ناوخۆی هەرێمی كوردستان رایگەیاند، بڕیاری داخستنی کامپی ئاوارەکان لە هەرێمی کوردستان پێداچوونەوەی بۆ دەكرێت، بۆ ئەمەش لیژنەیەكی هاوبەشی كوردستان و عێراق و نەتەوە یەكگرتووەكان كاری لەسەر دەكەن.

ئەمڕۆ دووشەممە 8.7.2024، رێبەر ئەحمەد لە لێدوانێکی رۆژنامەوانیدا بۆ میدیاكان ئاماژەی بەوە دا، بڕیاری وەزارەتی کۆچ و کۆچبەرانی عێراق بۆ داخستنی کامپەکان، بێ راوێژ بووە لەگەڵ حکومەتی هەرێمی کوردستان و نەتەوە یەکگرتووەکان و خودی ئاوارەکانیش.

وتیشی، ئەم كارە بووەتە جێگەی نیگەرانیی ئاوارە و پەنابەرانی دانیشتووی کەمپەکان.

بە قسەی وەزیری ناوخۆی كوردستان، حكومەتی هەرێم لەگەڵ گەڕانەوەی سەربەرزانە و ئارەزوومەندانەی ئاوارەکانی دانیشتووی کامپەکانە بۆ ناوچەکانیان، ئەمەشیان بە نووسراوی فەرمی ئاراستەی نووسینگەی سەرۆکوەزیرانی عێراق محەمەد شیاع سودانی کردووە.

رێبەر ئەحمەد وتی، لیژنەیەکی هاوبەش لە نێوان هەردوو حکومەتی هەرێم و عێراق و نەتەوە یەکگرتووەکان پێکدەهێندرێت بە مەبەستی پێداچوونەوە بە بڕیاری وەزارەتی کۆچ و کۆچبەرانی عێراق، لە بارەی داخستنی کامپی ئاوارەکان، بڕیاری پێکهێنانی لیژنەکەش دوای ئاراستەکردنی نووسراوەکە بۆ نووسینگەی سوودانی دەرکراوە.

لە هەرێمی کوردستان 900 هەزار و 467 ئاوارە و پەنابەر لە ناو و دەرەوەی کامپەکان دەژین، لەو ژمارەیەدا 269 هەزار و 293یان پەنابەرن و لە وڵاتانی دیکەوە هاتوونەتە کوردستان، بەشێكیشیان لە شارەكانی دیكەی عێراقەوە لەگەڵ دەستپێكردنی شەڕی داعش لە 2014 هاتوونەتە هەرێم.