وێنەیەک لە مەیدانی ئاژەڵانی هەولێر. فۆتۆ؛ 964
دوانیان گیانیان لە دەست داوە
لە نەینەوا 10 حاڵەتی تای خوێنبەربوون تۆمار کراوە
964+
پێشەوا محەمەد
تەندروستیی نەینەوا رایدەگەیەنێت، لە سەرەتای ئەمساڵەوە تا ئێستا 10 حاڵەتی تای خوێنبەربوونیان تۆمار کردووە و دوو کەسیان گیانیان لە دەستداوە.
ئەمڕۆ یەکشەممە 23.6.2024 بەشار جادر، وتەبێژی تەندروستیی نەینەوا رایگەیاندووە، 11 حاڵەتی دیکەی گوماناوییان هەبووە و چارەسەریان بۆ کردوون و نەخۆشخانەیان جێهێشتووە.
بە گوێرەى ئامارەکانى وەزارەتى کشتوکاڵ، لە ئەمساڵدا نزیکەی 50 حاڵەتى توشبوون و پێنج حاڵەتى گیانلەدەستدان بە تای خوێنبەربوون لە پارێزگاکانى بەغدا، نەینەوا، زیقار و بابل تۆمار کراون.
هەر بە پێی ئامارەکانی وەزارەتەکە، ساڵى رابردوو 545 حاڵەتى تووشبوون و 70 حاڵەتى گیانلەدەستدان لە پارێزگاکانی عێراق هەبووە.
سامان بەرزنجی، وەزیری تەندروستیی حکومەتی هەرێم لە کۆتاییەکانی مانگی رابردوودا لە کۆنگرەیەکی رۆژنامەوانیدا رایگەیاند، ژن و پیاوێک لە ئاکرێ تووشی تای خوێنبەربوون بوون و پیاوەکە بە گەیشتنی بە نەخۆشخانە بەهۆی سەختیی نەخۆشییەکەوە گیانی لە دەست داوە.
