ئاژەڵفرۆشان دەتوانن بچنە ئەوێ
مەیدانی نوێی ئاژەڵفرۆشانی سلێمانی بۆ جەژن ئامادەیە
964+
رێژوان مامە قادر – سلێمانی
مەیدانی نوێی ئاژەڵفرۆشانی سلێمانی بۆ جەژنی قوربان ئامادەیە و بەڕێوەبەری پڕۆژەکە دەڵێت، مەیدانەکە 10 دۆنمە و دوای ئەو دەست بە دروستکردنی بەشەکانی دیکە دەکەن.
مەیدانەکە کەوتووەتە پشتی بازگەی عەربەت و ناو گوندی یەک ماڵ، ماوەی ساڵ و نیوێکە کاری تێدا دەکرێت.
هاوڕێ عومەر حەمەکەریم، ئەندازیار و بەڕێوەبەری پڕۆژەکە بە 964ـی راگەیاند، پڕۆژەکە بە گشتی لەسەر 77 دۆنم زەوی دروست دەکرێت، کە جگە لە مەیدانی ئاژەڵفرۆشان، قەسابخانە، خانی حەیوان، ژمارەیەک دوکان، کۆگای پێستە و عەلەف، بنکەی تەندروستی و پۆلیس و چێشتخانەی تێدا دەبێت و مەیدانی ئاژەڵی بچووک و گەورەش جیادەبێت.
وتیشی، “ئێمە بۆ جەژن مەیدانی ئاژەڵفرۆشەکان تەواو دەکەین و ئامادە دەبێت و بە ئاژەڵفرۆشەکانیشمان وتووە، ئیدی ئەوان نازانین ئاخۆ بۆ جەژن دێن یاخود دوای جەژن، چونکە ئێستا بەرەو جەژنی قوربانە و ئەوان زۆر سەرقاڵن”.
پێشتر قایمقامیەتی سلێمانی شوێنی ئاژەڵفرۆشانی ئێستای داخست و بەهۆی نزیکیی لە ئاوەدانی و پیسی و بۆنی مەیدانەکە بڕیاری دروستکردنی ئەو مەیدانە نوێیەی داوە کە دەکەوێتە دەرەوەی شاری سلێمانییەوە.
بەڕێوەبەری پڕۆژەکە وتیشی، “دوای تەواوکردنی مەیدانەکە دەست بە دروستکردنی قەسابخانە و بەشەکانی دیکەی پڕۆژەکە دەکەین و ماوەی ساڵ و نیوێک کاتی ئیشکردنمان ماوە”.
پێداچوونەوە: توانا نەقی
