تەنیا ئەمڕۆ زیاتر لە 100 دۆنم زەویی چێندراو بە گەنم سووتاوە

پێشەوا محەمەد

تەنیا ئەمڕۆ شەممە 1.6.2024 زیاتر لە 100 دۆنم زەویی چێندراو بە گەنم سووتاون و هۆکارێکی کەوتنەوەی بەشێک لە ئاگرەکان کەمتەرخەمی بووە.

نزیکی نیوەڕۆ ئاگرێک له‌ ده‌غلودانی جوتیارانی گوندی مورتكه‌ی نزیك قه‌زای قوشته‌په‌ له‌ هه‌ولێر کەوتەوە و 60 دۆنم گەنمی کردووە بە قەرەبرووت.

یەکێک لە جوتیارەکان، کە زیانی ئاگرەکەی بەرکەوتبوو بە 964ـی راگەیاند، بڕیار بووە سبەینێ دەڕاسە بچێت و گەنمەکەی بدوورێتەوە.

نزیکی عەسر ئاگر لە بەرهەمی گەنمی جوتیارێک کەوتەوە لە گوندی “دولیجان ساڵح ئاغ” لە سنووری ناحیەی رۆڤیای سەر بە قەزای بەردەڕەش و نزیکەی 30 دۆنم زەوی سووتاوە.

بەرگریی شارستانیی ئاکرێ ئەوکاتە بە 964ـی راگەیاند، گەرمیی هەوای ئاگزۆزی بارهەڵگرێک لەناو گەنمەکەدا بووەتە هۆکاری دروستبوونی ئاگرەکە.

بەرەبەری ئێوارەش بەهۆی وەرگەڕان و سووتانی ئۆتۆمبێلێکەوە، “نزیکەی 20 دۆنم گەنم” لە سنووری گوندەکانی مەمەنداوە، قەرەتەپە و دێلێژە لە دەڤەری مەرگەی دوکان لە نزیک ئیدارەی راپەڕین سووتان.

کەوتنەوەی ئەو ئاگرانە لەکاتێکدایە، بەڕێوەبەرایەتییەکانی بەرگریی شارستانی رێنمایی خۆپارێزییان بۆ جوتیاران بڵاوکردووەتەوە و هۆشداریان لە بەکارنەهێنانی هەر کەلوپەل و ئامێرێک داوەم کە ببێتە هۆکاری ئاگرکەوتنەوە لە کاتی دروێنەدا.