رێکار و مەرجەکانی پێدانی مۆڵەتی شۆفێری بە کەسانی نابیس راگەیەندرا

ئەحمەد مستەفا

عەمید شیلان عوسمان، بەڕێوەبەری بەشی مۆڵەت لە هاتوچۆی سلێمانی بۆ رادیۆی فەڕمی هاتوچۆی پارێزگای سلێمانی راگەیاند، وردەکارییەکانی پێدانی مۆڵەتی شۆفێری بە کەسانی نابیس و مەرج و رێکارەکانی ئەم پرۆسەیەی راگەیاند.

بەپێی ئەو زانیارییانەی راگەیەندراون، پێدانی مۆڵەتی شۆفێری بە کەسانی نابیس بە هەماهەنگی وەزارەتەکانی ناوخۆ، تەندروستی و کار و کاروباری کۆمەڵایەتی ئەنجام دەدرێت و چەند مەرج و رێنماییەکی بۆ دانراوە.

مەرج و ڕێکارە سەرەکییەکان:

• ئاسانکاری لە وەرگرتنی وانەکان: بۆ کەسانی نابیس لە شێوازی وەرگرتنی وانەکانی فێرکاریی شۆفێریدا ئاسانکاری دەکرێت.
• پڕکردنەوەی فۆڕم و پشکنینی پزیشکی: سەرەتا فۆڕمێک بە داواکاریی مۆڵەتخواز دەدرێت و دواتر بۆ پشکنین دەچێتە لیژنەی پزیشکی.
• مەرجی خوێندەواری: کەسی نابیس بۆ وەرگرتنی مۆڵەتی شۆفێری دەبێت خوێندنەوە و نووسین بزانێت. ئەوانەی خوێندەوارییان نییە، بۆ فێربوونی خوێندنەوە و نووسین دەچنە پەیمانگەی تایبەت بە خۆیان.
• فێرکاری بە زمانی ئاماژە: وانەکان لەلایەن مامۆستای زمانی ئاماژەوە بۆ کەسانی نابیس ڕوون دەکرێنەوە.
• بینینی مانۆڕەکان بە ڤیدیۆ: بۆ ئاسانکردنی فێربوون، هەموو مانۆڕەکانی شۆفێری بە شێوەی ڤیدیۆ پیشانی کەسانی نابیس دەدرێن.
• ئاسانکاری لە دەستپێکردنی مامەڵەکان: کەسانی نابیس دەتوانن بۆ دەستپێکردنی مامەڵەکانیان فۆڕمی پێویست لە نووسینگەکانی هاتوچۆ وەربگرن.
• تایبەتمەندیی ئۆتۆمبێلەکان: ئۆتۆمبێلەکانی کەسانی نابیس بە دوو ئاوێنەی گەورەتر ئامادە دەکرێن و هێمایەکی تایبەتیان پێوە دەکرێت. هەروەها هێمایەک لە پشت مۆڵەتی شۆفێرییەکەیان دادەنرێت بۆ ناسینەوەی ئەوەی خاوەن مۆڵەتەکە نابیسە.

عەمید شیلان عوسمان ئەوەشی وتووە، مۆڵەتی شۆفێری بۆ کەسانی نابیس تەنیا لە جۆری B و BE دەدرێت، ئەم رێکارانە بە مەبەستی ئاسانکردنی پرۆسەی فێرکاری و وەرگرتنی مۆڵەتی شۆفێری بۆ کەسانی نابیس دیاری کراون.

مۆڵەتی جۆری B: بۆ شۆفێریکردنی ئۆتۆمبێلی سواریی ئاسایی، لە سنووری کێش و ژمارەی شوێنی دانیشتن کە یاسا دیاری دەکات.
مۆڵەتی جۆری BE: بۆ شۆفێریکردنی ئۆتۆمبێلی جۆری B کە عارەبانەیەکی لێوە بەستراوە، لە سنووری کێش و مەرجە یاساییە پەیوەندیدارەکاندا.