لە هەولێر هەرچى زێدەڕۆییە لا دەبرێت

964+

وریا فەتاح

ئاگرکەوتنەوەکان ئەم ماوەیەى رابردوو، واى لە شارەوانیى هەولێر کردووە بە خەستى دەست بە کارکردن بکات بۆ رێکحستنەوەى بازاڕ و شەقامەکان، هەر بۆیە لیژنەکانیان شەو و رۆژ سەرقاڵى لابردنى زێدەڕۆییەکانى.

کارزان عەبدولهادى، سەرۆکى شارەوانیى هەولێر لە لێدوانێکى پێشووتردا بە 964ـى وت، “هەڵمەتەکە تەنیا بۆ رێکخستنەوەى شەقامەکانە لەو جەنجاڵییەى بەهۆى زێدەڕۆییەکانەوە دروستبووە، ئێمە شوێنیان بۆ دیارى دەکەین و نابینە رێگر لە کاروکاسپى هیچ کەس”.

ئەمڕۆ پێنجشەممە، 30.5.2024، لەلایەن تیمى شارەوانییەکانى چوار و پێنج، بەشێکی دیکەی زێدەڕۆیی لە گەڕەکی هەولێری نوێ و شەقامی 100 مەتری و شەقامی 120 مەترى لادران.

شەوى رابردووش، تەواوی بازاڕی شێخ مستەفا و دوکانەکانی چواردەوری قەڵات لە زێدەڕۆیی رێکخرانەوە، کە ئاستەنگى هاتوچۆیان بۆ هاوڵاتیان دروستکردبوو.

هەر لە هەڵمەتەکەدا، رۆژى سێشەممە 28.5.2024، تیمی شارەوانییەکانی سێ و چوار و پێنج و شەش، هەڵسان بە رێکخستنەوەی شۆستە و شەقامەکان و لادانی زێدەڕۆیی لە گەڕەکەکانی شێخ ئەحمەد، گوڵان، هەولێری نوێ،  گەڕەکی راستی، ژیان، بەهاری کۆن، نەورۆز و کۆگاکانی پشت فاملی مۆڵ و بەشێک لە شەقامی 100 مەتری گەڕەکی باداوە .

هەڵمەتەکەى شارەوانیى هەولێر، رۆژانە بەردەوامیی دەبێت و پێشتریش بازاڕەکانى لەنگە و شێخەڵڵا و چەند شوێنێکى دیکە لە زێدەڕۆیى پاککراونەتەوە.

شارەوانى هەولێر شەقامەکان رێکدەخاتەوە