چەند خوێندکارێکی بەشداربووی خولەکە - وێنە: کشتوکاڵی هەڵەبجە
"دەتوانن ببنە خاوەن کاری خۆیان"
25 ژن بڕوانامەی پیشەسازیی خۆراکیان پێدرا
964+
پێشەوا محەمەد
25 ژنی دەرچووی کشتوکاڵی لە پارێزگای هەڵەبجە بڕوانامەی پیشەسازیی خۆراکیان پێدرا، کە ماوەی شەش رۆژ بوو خولیان بۆ کرابووەوە.
خولەکە لە لایەن رێکخراوی UNDPـیەوە کراوەتەوە و لە کۆتایی خولەکەشدا بڕوانامە بەسەر بەشداربوواندا دابەش دەکرێت.
ستار مەحمود، بەڕێوەبەری کشتوکاڵی هەڵەبجە بە 964ـی راگەیاند، ئەو پیکهاتە خۆراکییانەی خوێندکارەکان لە زانکۆ خوێندوویانە لە خولەکەدا بە کرداری دروستی دەکەن و دەبێتە هۆکارێک بۆ زیاتر بەرەوپێشبردنی توانای کشتوکاڵییان و بەرهەمهێنانی خۆراکی ئاوێتە.
وتیشی، “خولەکە لە لایەن پسپۆڕ و شارەزایانی پیشەسازیی خۆراکی ناوخۆیی و دەرەکییەوە وتراونەتەوە و شارەزاییەکی باش لەوبارەیەوە بە خوێندکارەکان دراوە.
بەڕێوەبەرایەتییەکە بەردەوام خولی جۆراوجۆری کشتوکاڵی بە هاوکاریی رێکخراوە نێودەوڵەتییەکان بۆ جوتیاران و دەرچووانی بەشە کشتوکاڵییەکان دەکاتەوە.
“ئەو خولە دەبێتە هۆکاری ئەوەی ئەو دەرچووانە ئاسانتر لە کارگە خۆراکییەکان دابمەزرێن یاخود خۆیان ببنە خاوەنی کارگەی خۆیان و ئێمەش بە هەموو شێوەیەک هاوکاریان دەبین”، ئەوەش قسەی ستار مەحمودە.
بەرنامەی گەشەپێدانی نەتەوە یەکگرتووەکان UNDP لە نزیکەی ١٧٠ وڵات و خاکدا کار دەکات، یارمەتیدەرە بۆ گەیشتن بە نەهێشتنی هەژاری و کەمکردنەوەی نایەکسانی و دوورخستنەوە. یارمەتیی وڵاتان دەدەن بۆ پەرەپێدانی سیاسەت، لێهاتوویی سەرکردایەتی، تواناکانی هاوبەشی، توانا دامەزراوەییەکان و بنیاتنانی خۆڕاگری بە مەبەستی بەردەوامبوونی ئەنجامەکانی گەشەپێدان.