دەرهێنانی پاسپۆرت لە چەمچەماڵ راگیرا

964+

پێشەوا محەمەد

نووسینگەی پاسپۆرتی چەمچەماڵ دەرهێنانی پاسپۆرتی راگرت و بەڕێوەبەرەکەی دەڵێت، هۆکارەکەی گۆڕانی سیستمەکەیانە بۆ ئەلیکترۆنی.

پێشتر نووسینگەکە پاسپۆرتی جۆری Aـی بۆ هاوڵاتیان دەردەهێنا، بەڵام سیستمەکە گۆڕاوە بۆ پاسپۆرتی ئەلیکترۆنی جۆری Bـی و پێویستە سەرجەم نووسینگەکان ئەو سیستمە بەکاربهێنن.

دڵشاد عوبێد، بەڕێوەبەری نووسینگەی پاسپۆرتی چەمچەماڵ بە 964ـی راگەیاند، راگرتنەکە کاتییە و هەر هاوڵاتییەک بیەوێت پاسپۆرت دەربهێنێت پێویستە سەردانی سلێمانی بکات.

وتیشی، “نازانین کەی سیستمەکەمان بۆ دادەمەزرێت، چونکە دەبێت لیژنە لە بەغداوە بێت و بڕیاری لەبارەوە بدرێت و ئامێرەکانمان بۆ بنێردرێن”.

بەڕێوەبەرایەتییەکە هاوڵاتیانی چەمچەماڵی ئاگادار کردووەتەوە، بۆ دەرهێنانی پاسپۆرت لە بەڕێوەبەرایەتیی گشتیی پاسپۆرتی سلێمانی پێویستیان بە چەند پێداویستییەکە:

*حیجزی ئەلیکترۆنی کە شەوانی پێنجشەم لە کاتژمێرنۆ بەدواوە چالاک دەبێت.

*کارتی نیشتمانیی رەسەن.

*کارتی زانیاریی رەسەن.

*کار بە سوورەتقەیدی ئلکترونی و پێناسەی باری شارستانی و رەگەزنامەی عێراقی ناکرێت.

*پێویستە ئەو هاوڵاتیانەی سەروی 18 ساڵن کارتی بانکی بەناو خۆیانەوە بێت و ئەوانەی خواروی 18 ساڵن دەتوانن کارتی بانکیی باوکیان بەکاربێنن.

ئەگەر کارتی نیشتمانیت نییە سەردانی پاسپۆرتی سلێمانی مەکە