وێنهى ئه‌و هاوڵاتییهى ونبووه كه كهسوكارهكهى له سۆشیاڵ میدیاكانى سۆران بڵاویان كردووهتهوه..
له‌گه‌ڵ گرووپێکی 11 كه‌سی بووه
هاوڵاتییه‌كى ته‌مه‌ن 60 ساڵان له كوێستانه‌كانى زینوێ ونبووه
964+
فه‌رهاد حه‌سه‌ن
هاوڵاتییه‌ك له كوێستانه‌كانى زینوێی باڵه‌كایه‌تى له دوێنێوه ونبووه، ئه‌وانه‌ى به‌دوایدا ده‌گەڕێن، ده‌ڵێن هاوڵاتییه‌كه له‌گه‌ڵ 11 كه‌س چوونه‌ته گیای به‌هاره و ته‌نیا ئه‌و نه‌گه‌ڕاوه‌ته‌وه.
هاوڵاتییه‌كه ناوى حوسێن حه‌سه‌نە، ته‌مه‌ن 60 ساڵە.
دوایین جار كه په‌یوه‌ندی به مۆبایله‌كه‌ى كراوه، كاتژمێر 05:30ـی ئێوارەی دوێنێ شەممە بووه و وه‌ڵامى په‌یوه‌ندییه‌كه‌ی ده‌داته‌وه، به‌ڵام ده‌ڵێن، ناڵە و هاواری هاتووه و دواتر مۆبایله‌كه‌ى داخراوه.
په‌یوه‌ندی به كۆمپانیاى كۆڕه‌كه‌وه ده‌كرێت و شوێنى دوایین په‌یوه‌ندیكردنى ئاشكرا ده‌كرێت، به‌ڵام كه ده‌چنه شوێنه‌كه له‌وێ نه‌بووه.
ته‌ها ناوه‌ندى، چالاكوانى ژینگه‌یی و دانیشتووى باڵه‌كایه‌تى له‌گه‌ڵ چه‌ند گرووپێك له دوێنێ شه‌وه‌وه به دواى ئه‌و هاوڵاتییه‌دا ده‌گه‌ڕێن و به 964ـى وت، نه‌یاندۆزیوه‌ته‌وه.
وتیشی “ئه‌و 11 كه‌سه‌ى له‌گه‌ڵى بوونه، گه‌ڕاونه‌ته‌وه، به‌ڵام ئه‌و هاوڵاتییه‌یان لێ دابڕاوه”.
ئه‌و سنووره‌ى كه هاوڵاتییه‌كه بۆی چووه، بریتیه لە كوێستانى زینوێ و مێرگە درێژان.
ئاماژه‌ى به‌وه‌ش كرد، ئێستاش گه‌ڕان بۆ دۆزینه‌وه‌ى ئه‌م هاوڵاتییه به‌رده‌وامه و چه‌ند گرووپێكی جیاواز كه له 150 كه‌س پێكدێن، له شوێنی جیاوازه‌وه به دواى هاوڵاتییه‌كه‌دا ده‌گه‌ڕێن.