دیمەنی کردنەوەی کۆگاکە _ وێنە: 964
لە هەڵەبجەش کرایەوە
ناوەندی هەماهەنگی و قەیرانەکان بوو بە خاوەنی پێنج کۆگا
964+
ئەحمەد مستەفا
ناوەندی هەماهەنگی و قەیرانەکانی هەرێمی کوردستان (JCC)، کۆگای وەڵامدانەوەی قەیران و کارەساتەکانی لە پارێزگای هەڵەبجە کردەوە، تاوەکو ئێستا وەزارەتی ناوخۆ، پێنج کۆگای هاوشێوەی لە پارێزگاکانی هەولێر، سلێمانی، دهۆك، ئیدارەی سەربەخۆی زاخۆ و هەڵەبجە هەیە و بڕیارە لە ئیدارەی سۆران هەمان کۆگا بکرێتەوە.
لە بڵاوکراوەیەکی نووسینگەی سروە رەسوڵ، بەڕێوەبەری گشتیی ناوەندی قەیرانەکان کە بە 964 گەیشتووە، ئاماژە بەوە کراوە، “کۆگاکە بە شێوازی ستانداردی نێودەوڵەتی بونیاتنراوە و سیستمێکی دیجیتاڵی بۆ داندراوه، کە تەواوی کۆگاکانی هەرێمی کوردستان بەیەکەوە دەبەستێتەوە، کۆگاکە ئامێر و کەلوپەلی تەواوی بۆ دابینکراوە و لەسەر رووبەری دوو هەزار و 800 مەتر دووجا بونیاتنراوە”.
بە گوێرەی بڵاوکراوەکە، “کۆگاکە ساردکەرەوە، بارهەڵگر و تەواوی پێداویستییەکان لە خۆدەگرێت بۆ رووداوە دەستکرد و سروشتییەکان و رزگارکردنی زیانلێکەوتووان، تیمەکانیش راهێنانیان پێکراوە لەسەر چۆنیەتی بەکارهێنانی کۆگاکە و کەلوپەلی پێویستیش بۆ بەهاناوەچوون و فریاگوزاری تێدا بەردەستە”.
ئەو ناوەندە، کە سەر بە وەزارەتی ناوخۆی حکومەتی هەرێمی کوردستانە، بەڕێوەبردنی زانیارییەکان، وەڵامدانەوە و بەڕێوەبردنی قەیران، هاوکاری و هەماهەنگی لەگەڵ وەزارەت و فەرمانگەکان و کۆمەڵگای نێودەوڵەتی و رێکخراوە ناحکومییەکان، هەروەها کۆکردنەوەی سەرچاوە داراییەکان و جۆرەکانی تری هاوکاری و ئاسانکاری بۆ گەیاندنی هاوکاری مرۆیی و وەڵامدانەوەی قەیرانەکان لە ئەرکە سەرەکییەکانیەتی.