15 کەس بریندارن
بارهەڵگرەکە خۆى بە 20 ئۆتۆمبێلدا کێشاوە
+964
بەرزان عوسمان
رووداوێکى سەختى هاتوچۆ لە بازگەى دەروازەى قەزاى دوکان روویدا و بارهەڵگرێک خۆى کێشاوە بە 20 ئۆتۆمبێلدا و ژمارەیەک کەس بریندار بوون.
رێگەپێدراوێکى هاتوچۆ لە شوێنى رووداوەکە بە پەیامنێرى 964ـى وت،”رووداوەکە بەهۆى لەکۆنتڕۆڵ دەرچونى بارهەڵگرێک روویداوە و بەهۆیەوە بارهەڵگرەکە خۆى کێشاوە بە 20 ئۆتۆمبێلدا”.
هەرچەندە هاتووچۆى دوکان رایگەیاندووە کە بارهەڵگرەکە خۆى بە 13 ئۆتۆمبێلدا کێشاوە، بەڵام بە وتەى ئەو رێپێدراوەى هاتوچۆ ژمارەیەک ئۆتۆمبێل زیانەکانیان کەم بووە و شوێنەکەیان جێهێشتووە.
بە وتەى تەندروستى دووکان 11 بریندارى رووداوەکە گەیشتونەتە نەخۆشخانەى دوکان، بەڵام بەهمەن عەبدوڵا وتەبێژی هاتوچۆی سلێمانی رایگەیاند، لە رووداوەکەدا 15 کەس بریندار بوون.
پێداچوونەوە: توانا نەقی