کاتی کارکردن لە بۆرییە شکاوەکەدا - وێنە: شارەوانیی سلێمانی
کێشەی بۆ شەقامەکە دروستکردووە
شکاویی بۆرییە ئاوەڕۆکەی شەقامی مەلیک مەحمود چارەسەر کرا
964+
پێشەوا محەمەد
زیاتر لە مانگێکە بۆرییەکی ئاوەڕۆی شەقامی مەلیک مەحمود لە شاری سلێمانی پچڕابوو، بەڵام شارەوانی دەڵێت، چاککراوەتەوە و کێشەی نەماوە.
بۆرییەکە لە نزیک هۆتێل تایتانیکەوە پچڕابوو و بووبووە هۆی ئەوەی بەردەوام ئاوێکی زۆر بگەڕێتەوە سەر شەقامی گشتیی 60 مەترییەکە بەتایبەت لە کاتی بارانباریندا.
زەردەشت رەفیق، وتەبێژی شارەوانیی سلێمانی هۆکاری درەنگ چاککردنی بۆرییەکەی بۆ 964 روونکردەوە و وتی، “کێبڵی کارەبا و ئینتەرنێت لەو شوێنەدا هەبوو بۆیە چارەسەرکردنەکەی دواکەوت.
وتیشی، “تەواوی کارەکانی کراوە و بۆرییەکە گۆڕدراوە و بۆکسێکی بۆ کراوە و بە ئاوەڕۆی سەرەکیی شەقامەکەشەوە بەستراوەتەوە”.
پێشتریش لە چەند شەقامێکی ناوشاری سلێمانی شکانی بۆری هەبووە کە کێبڵی کارەبا و ئینتەرنێتیان بەسەرەوە بووە و بەو هۆیەوە کاری چاککردنەوەیان دواکەوتووە.
زەردەشت رەفیق ئاماژەی بەوەش دا، لە چەند رۆژی داهاتوودا کاری قیرتاوکردنەوەکەشی دەکەن و شەقامەکە ئاسایی دەبێتەوە.
لەکاتی کارکردن لە چاککردنی ئەو بۆریی ئاوەڕۆیەدا بەشی لاوەکیی شەقامەکە لەو شوێنەدا گیرابوو.
