وێنەیەکى بنکەى کالسوو دواى تەقینەوەکە وێنە: میدیاکانى نزیک لە حەشدى شەعبى
شانەى راگەیاندنى ئەمنیى عێراق وا دەڵێت
“لە تەقینەوەکەى بنکەى سەربازى کالسوو کەسێک کوژرا و 8 برینداریش هەیە”
964+
وریا فەتاح
شانەى راگەیاندنى ئەمنیى عێراق پشتڕاستى دەکاتەوە، لە تەقینەوەکەى بەرەبەیانى ئەمڕۆى بنکەى سەربازى کالسوو لە باکورى پارێزگاى بابل، کەسێک کوژراوە و هەشت کەسیش بریندار بوون، ئاشکراشى دەکات لەو کاتەدا هیچ فڕۆکەیەکى بێفڕۆکەوان و فڕۆکەیەکى جەنگى لە ئاسمانى عێراقدا نەفڕیوە.
سەربازگەکە بارەگاى سوپاى و پۆلیس و هێزەکانى حەشدى شەعبییە و بەرەبەیانى ئەمڕۆ کاتژمێر 1:00 چەند تەقینەوەیەک تێیدا روویاندا.
بەپێى راگەیەندراوى شانەى ئەمنى، لە تەقینەوەکەدا ئەندامێکى هێزەکانى حەشدى شەعبى کوژراوە و هەشت کەسى دیکەش بریندار بوون، کە یەکێکیان ئەندامی سوپاى عێراقە.
هەرچەندە ئەمەریکا و هاوپەیمانان رەتیانکردەوە کە ئەوان هێرشەکەیان ئەنجامدا بێت، بەڵام وەک ئەوەى شانەى ئەمنى روونى کردووەتەوە، لە رێگەی هەوڵە تەکنیکییەکان و رادارەوە، دەرکەوتووە شەوی رابردوو هیچ فڕۆکەیەکی بێفڕۆکەوان یان فڕۆکەیەکی جەنگی لە ئاسمانی بابلدا پێش تەقینەوەکە و دواى تەقینەوەکە بوونیان نەبووە.
