چەند كرێكارێك لە كاتی كاركردندا لە یەكەكانی نیشتەجێبوون لە كوردستان، وێنە: میدیاکان
بۆ جێبەجێکردنی رێکاری سەلامەتی
لیژنەیەک بۆ سەلامەتیی کرێکاران سەردانی پڕۆژەکان دەکات
964+
پێشەوا محەمەد
لیژنەیەکی لقی سلێمانیی سەندیکای کرێکارانی کوردستان سەردانی پڕۆژەکان دەکەن و لە رێکارەکانی سەلامەتیی کرێکاران دەکۆڵنەوە.
چالاک رەئوف، سەرۆکی لقی سلێمانی سەندیکای کرێکارانی کوردستان بە 964ـی راگەیاند، لە سەردانی پڕۆژەکان دەیانەوێت دڵنیایی زیاتر بۆ سەلامەتیی کرێکار وەربگرن و ئەگەری روودانی رووداوە نەخوازراوەکا کەمبکەنەوە.
وتیشی، “بەپێی بەدواداچوونی ئێمە زۆرینەی ئەو رووداوانەی بەسەر کرێکاراندا دێت لەسەر پڕۆژەکان بەهۆی کەمتەرخەمیی پڕۆژەکان و نەبوونی رێکارە سەلامەتییەکانەوەیە لەسەر کار، بەشێک لە کرێکارەکانیش خۆیان پابەندی سەلامەتیی کار نابن”.
ساڵی رابردوو لە هەرێمی کوردستان نزیکەی 70 کرێکار لەسەر کار و پڕۆژەکان گیانیان لەدەستداوە و زیاتر لە 150 کرێکاریش بریندار بوون.
چالاک رەئوف وتیشی، “رێنمایی دەدەینە پڕۆژەکان بۆ پابەندبوونیان بە رێکارەکانی سەلامەتی و هەماهەنگیشمان لەگەڵ لایەنە پەیوەندیدارەکان هەیە بۆ لێپرسینەوە لەو پڕۆژانەی کەمتەرخەمن لەو رووەوە”.
