جۆگەی سەرەکیی ئاودێریی چوارقوڕنە زیانی پێگەیشتووە

پێشەوا محەمەد

جۆگەی سەرەکیی ئاودێریی چوارقوڕنە زیانی پێگەیشتووە و بەڕێوەبەرایەتیی سەرچاوەکانی ئاوی راپەڕین دەڵێت، بەشێوەی کاتی چاکسازیی تێدا دەکەن.

964 لە بەڕێوەبەرایەتییەکەوە دەزانێت، زیانەکان بەهۆی باران و لافاوەوە بەو جۆگەیە گەیشتووە، بەشێکی شکاوە و لەژێر جۆگەکەش ترازان روویداوە.

سپاردە محەمەد، بەڕێوەبەری سەرچاوەکانی ئاوی راپەڕین بە 964ـی راگەیاند، پێویستە جۆگەکە چاک بکرێتەوە، چونکە وەرزی ئاودان زۆری نەماوە و ئەو جۆگەیەش بەشێکی سەرەکییە بۆ جوتیارانی چوارقوڕنە بۆ ئاودانی زەوییە کشتوکاڵییەکانیان.

وتیشی، “جۆگاکە بەهۆی ئەو کەلوپەلەی لافاو لەگەڵ خۆیدا هێناوە زیانی بەرکەوتووە و سەرچاوەی ئاوەکەشی سەدەکەی سەروچاوەیە، بەڵام لەبەرئەوەی زەوییەکی زۆری کشتوکاڵیی لەسەرە دەبێت هەرچی زووە چاک بکرێتەوە”.

بەڕێوەبەرایەتییەکە پلانی لابردن و دروستکردنەوەی جۆگەکەی هەیە و ئێستا لە قۆناغی نەخشەسازیدایە.

بەڕێوەبەری سەرچاوەکانی ئاوی راپەڕین روونیشیکردەوە، ئەمساڵ چاکسازیی تێدا دەکەن و ئەگەر بوودجەیان بۆ دابین بکرێت ساڵی داهاتوو سەرلەنوێ جۆگاکە دروست دەکەنەوە، بەشێوەیەک کە جارێکی دیکە زیانی بەرنەکەوێت.