یەکێکیان ماوە بدۆزرێتەوە
یەکێک لە تەرمەکانی لافاوەکەی دهۆک دۆزرایەوە
964+
زەید کۆچەر – دهۆک
کەمێک پێش ئێستا تەرمی یەکێک لەو دووکەسەی لە لافاوەکەی دهۆک خنکان و دیار نەمابوون لەلایەن بەرگری شارستانییەوە دۆزرایەوە.
ئەمرۆ 9 رۆژ بەسەر لافاوەکەی دهۆکدا تێپەڕیوە و تەرمی یەکێک لەو دوو کەسە دۆزرانەوە کەوا بە رەگەز عەرەبن، تەرمەکە کەوتووەتە ناو چەم و رەز و باغی ناوچەی گردی سۆر لە سەنتەری دهۆک.
بێوار عبدلعەزیز، بەرپرسی راگەیاندنی بەرگری شارستانی دهۆک بە 964ـی وت، دوای ئەو چەند رۆژە ئەمڕۆ توانیویانە تەرمێک بدۆزنەوە، ئێستا لەژێر توێکاری و لێکۆڵینەوەدایە بەهۆی ئەوەی ماوەی ئەم چەند رۆژە لە ژێر قوڕ و لیتەدا بووە بە ئاسانی ناناسرێتەوە.
وتیشی، ئیستا هەموو هەوڵێک دەدریت بۆ دۆزینەوەی کەسی دووەم و تاوەکو سەر بەنداوی موسڵیش رۆیشتوون و هیواخازن بە زووترین کات ئەویش بدۆزنەوە.
بەهۆی لافاوەکەی 20.3.2024 لە دهۆک و زاخۆ جگە لە گیان لەدەستدانی ئەو دوو کەسە، زیانێکی زۆری مادی بەر ئۆتۆمبێل و گەڕەک و خانووی هاوڵاتیان کەوت.
