دەرکەوتنی پاشماوەی مین و تەقەمەنی _ وێنە: دەزگای مین
"مەترسیی هەیە"
دەزگای مین: مەچنە قەراغ چەم و رووبارەکان
964+
ئەحمەد مستەفا
بەهۆی بەفربارین، بارانی بەخوڕ و دروستبوونی لافاو مەترسی هاتنە خوارەوەی مین هەیە لە ناوچە شاخاوییەکان، دەزگای مین دەڵێت، لە قەراغ چەم و رووبارەکان نزیک مەبنەوە.
ئەمڕۆ چوارشەممە 20.3.2024، دەزگای گشتی کاروباری مین لە بڵاوکراوەیەکدا دەشڵێت، داواکارن بە هیچ شێوەیەک، خەڵک لە ناوچە مینڕێژکراوەکان و قەراغ چەم و رووبارەکان نزیک نەبنەوە، ئەوەش بەهۆی بوونی مەترسی مین و تەقەمەنی.
ناوچە سنورییەکانی هەرێمی کوردستان و نزیک گوندەکان، تائێستاش بە پلەی یەکەم مین و تەقەمەنی پاشماوەی شەڕی ئێران و عێراقی 1980 بۆ 1988ی تێدا ماوەتەوە، دەزگاکە داوادەکات، لە کاتی بینینی میـن و تـەقـەمـەنی لەو ناوچانە، لێی نـزیک مەبەوە، دەستکاری مەکە، بەڵکو پەیوەندی بکە بە هێلی گەرمی دەزگای مین ژمارە 182.
بە قسەی جەبار مستەفا، سەرۆکی دەزگای گشتیی کاروباری مینی هەرێمی کوردستان بێت بۆ 964، بەپێی ئەو رووپێویەی لە دەزگای گشتیی كاروباری مین هەیە 776 كیلۆمەتر چوارگۆشە لەهەرێمی كوردستان مینڕێژ كراوه و حکومەت بە هاوكاری رێكخراوە بیانییە هاوبەشەكان لە دوای ساڵی 1992ى زایینییەوە تا ئێستا توانیویەتى ئەو رێژەیە بۆ 258 کیلۆمەترى چوارگۆشە کەم بکاتەوە.
سه‌باره‌ت به‌و ناوچانه‌ی به مین چێنراون رێژه‌كه‌یان له شوێنێك بۆ شوێنێكی تر ده‌گۆڕێت به شێوه‌یه‌ك 60%ى دەكەوێتە سنووری پارێزگای سلێمانی و قەزای پێنجوێن، سۆران و چۆمانیش لەو قەزایانەن كە خاكیان زۆر پیسە بە مین و پاشماوەی جەنگی و دواتریش هەڵەبجە و گەرمیان دێن، جەبار مستەفا وای وت.