داوای بە دامەزراوەییکردنی کەرتی شوێنەوار دەکرێت

پێشەوا محەمەد

بەڕێوەبەرایەتییەکانی شوێنەوار لە هەرێمی کوردستان داوای بە دامەزراوەییکردنی کەرتی شوێنەوار دەکەن، بۆ ئەو مەبەستەش یاداشتێکیان لەوبارەیەوە داوەتە وەزیری شارەوانی و گەشتوگوزار.

964 دەزانێت، لە یاداشتەکەدا داوایان کردووە چیتر کەرتی شوێنەوار لە کوردستان لە پەراوێزدا نەمێنێتەوە و لە چوارچێوەی دامەزراوەیەکی سەربەخۆی حکومیدا کۆبکرێتەوە.

یەکێتی واحید، بەڕێوەبەری شوێنەواری کۆیە بە 964ـی راگەیاند، هەتا ئێستا شوێنەواری هەرێمی کوردستان چاوەڕێی وڵاتانی دەرەوە و رێکخراو و زانکۆ ئەوروپییەکانە، ئەوان نەبن هیچ کارێک لە ناوخۆ ناکرێت و کەرتێکی پەراوێزخراوە.

وتیشی، “کاری بەڕێوەبەرایەتییەکان پەرشوبڵاوە، ئەندازیار و پسپۆڕی شوێنەوارییان نییە، تەنانەت هەندێ بەڕێوەبەرایەتی کارمەند و پاسەوانی نییە، لە کاتێکدا کەرتی شوێنەوار زۆر گرنگە و پێگەی هەرێمی کوردستان زۆر دەباتە پێشەوە”.

لە هەرێمی کوردستان 11 بەڕێوەبەرایەتیی شوێنەوار هەن.

“دەبێت ساڵانە بودجەی تایبەت بە کەرتی شوێنەوار تەرخان بکرێت و جگە لە هەوڵی رێکخراو و زانکۆ ئەوروپییەکان حکومەتی هەرێمیش دەستی باڵای هەبێت لە کنە و پشکنین و نۆژەنکردنەوەی شوێنەوارەکان لە هەرێمی کوردستان”، ئەوەش قسەی یەکێتی واحیدە.

بەپێی ئاماری بەڕێوەبەرایەتیی گشتیی شوێنەوارەکانی هەرێم، پێنج هەزار و 800 شوێنەوار لە هەرێم دۆزراونەتەوە و تۆمار کراون.